пред 11 месеци 
Набавката на воена опрема поддржана од Европскиот мировен фонд со 9 милиони евра тече во согласност со планираната динамика, беше потврдено на денешниот прв состанок на Управувачкиот комитет одржан во Домот на Армијата.
Комитетот, чија основна задача е да ја следи реализацијата на овој проект, се состои од претставници на Министерството за одбрана, Генералштабот на Армијата, Организацијата за имплементација на мерката од Европскиот мировен фонд, Организацијата за унапредување на човековата безбедност (ИТФ) и Делегацијата на ЕУ во Скопје.
Директорот на Генералштабот, бригадниот генерал Симеон Трајковски, на отворањето на состанокот истакна дека оваа помош од Европската Унија наменета за потребите на македонската Армија ќе ги зајакне капацитетите на Армијата, ќе влијае на развојот на одбранбените способности и на интероперабилноста на Армијата.
Директорот на словенечката организација за унапредување на човековата безбедност – ИТФ, амбасадорот Томаж Ловренчич, агенција што ќе го имплементира проектот на Европскиот мировен фонд за поддршка на Армијата, додаде дека планираните активности се веќе почнати и се реализираат во согласност со стратешките цели, листа на приоритети и роковите на испорака на опрема за Армијата. Првата испорака истакна дека се очекува да биде во април оваа година.
Хозе Карлос Енгра Морено од Службата на Европската комисија за инструментите на надворешната политика ја истакна важноста на земјите од Западен Балкан за безбедноста на Европа и додаде дека покрај оваа помош за Северна Македонија, вакви проекти се веќе во тек и со други земји од регионот.
Средствата што се дел од овој проект се наменети за набавка на опрема за лесната пешадиска баталјонска група, и тоа логистичка, медицинска, инженерска и опрема за изведување обуки, комуникациско-информациски системи и за разузнавачки капацитети.
Текстот Министерството за одбрана: Набавката на опрема за Армијата, поддржана од Европскиот мировен фонд, тече според планираното е превземен од МАКФАКС.