Комбинацијата на руската и оксфордската вакцина ќе ги штити граѓаните две години

Комбинацијата на „спутник 5“ и таканаречената оксфордска вакцина, што ја произведува компанијата „Астра зенека“, ќе штити од коронавирусот две години, изјави Александар Гинзбург, раководител на Рускиот истражувачки институт за епидемиологија и микробиологија „Гамалеја“, на ТВ Русија 24.

Според него, овие две вакцини ќе обезбедат многу подобро формирање на мемориски клетки и ќе го зголемат имунитетот.

Овој месец, „Гамалеја“, Рускиот фонд за директни инвестиции, руската фармацевтска компанија „Р Фарм“ и фармацевтската компанија „Астра зенека“ потпишаа меморандум за соработка во развојот на вакцина против коронавирус.

Гинзсбург најави дека заедничките клинички испитувања на вакцината против коронавирус нема да бараат многу време и големи инвестиции, бидејќи вакцините се слични.

Извршниот директор на „Астра зенека“, Паскал Сорио, изјави дека комбинацијата од двете вакцини ќе овозможи програмата за вакцинација да биде флексибилна.

„Ова ќе биде единствена соработка во светот помеѓу двајцата производители на вакцини и се надевам дека ова ќе ни обезбеди најдобра заштита“, рече Сорио.