Влада: Резултатите од последниот квартал покажуваат излез од економската криза

На денешната 37. владина седница, пред преминувањето на точките од дневниот ред, министерот за финансии, Фатмир Бесими, ги информираше членовите на Владата за нивото на реализацијата на капиталните инвестиции за 2020 година при што беше констатирано дека голем број од институциите, над 95 проценти, ги реализирале инвестициите за што беше изразено задоволство со констатација дека сите економски мерки преземени минатата 2020 година дале резултати.

Истовремено, беше информирано и дека 95,4 проценти е реализацијата на сите пакети со економски мерки од ковид-програмата, кои беа донесени за полесно совладување на кризата кај граѓаните и претпријатијата.

Премиерот Зоран Заев заедно со министрите констатираше дека резултатите од последниот квартал покажуваат излез од економската криза и тоа дека Владата во однос на создавањето на економските услови за граѓаните е на вистинскиот пат и дека покрај здравствената криза, на светско ниво, во државата е обезбедено сочувување на работните места и создавање услови за обезбедена солидна потрошувачка на граѓаните.