СДСМ: Советниците на Груевски, меѓу кои и Мицкоски, државата ја чинеа 1,73 милиони евра

Димче Арсовски го дозакопа Христијан Мицкоски, советниците на Груевски, меѓу кои и самиот Мицкоски, државата ја чинеа 1,73 милиони евра, реагира СДСМ на обвинувањата на портпаролот на ВМРО-ДПМНЕ, Димче Арсовски, дека Зоран Заев назначил нови советници.

„Граѓаните добро знаат дека токму Христијан хидро Мицкоски беше еден од дури 91 советници на бегалецот од правдата, Никола Груевски, кои ги чинеа над 1,7 милиони евра. Згора на се, Христијан Мицкоски безобразно лажеше дека за местото советник на Никола Груевски, не земал паричен надомест, односно работел „про боно“. Сосема спротивно, се потврди дека Христијан Мицкоски на листата на советници на Никола Груевски имал плата со коефициент 1,8! Над два милиони денари ги чинеше граѓаните совеничкиот ангажман на Мицкоски во кабинетот на Груевски“, се наведува во реакцијата.

Два милиони денари за Мицкоски да го советува Груевски, додаваат од СДСМ, како да се водат погубни енергетски политики, и како струјата да поскапи за 100%.

„Тоа е зијанот на граѓаните од советувањата на Мицкоски, 100% поскапа струја! За другите, вкупно 91 советник на Груевски годишно од Буџетот на државата, се одвојуваа над 1,73 милиони евра, односно пет пати повеќе од таа што сега ја кажува ВМРО ДПМНЕ. Советниците на Груевски и нивните плати беа тајна за којашто не смееше да се зборува, а камоли да бидат транспарентно објавени. Меѓу листата на советници на Груевски за кои од Буџетот се одвојуваа над 1,7 милиони евра годишно, покрај Мицкоски се наоѓал и Луке Галевски, актуелниот шеф на центарот за комуникации на ВМРО-ДПМНЕ, денеска најголемиот извор на лажни вести и конструирани случаи. После 7 изборни порази зад себе, Мицоски и ВМРО ДПМНЕ никако да ја научат лекцијата и да ја примат пораката што им ја праќаат граѓаните. Затоа уште долго остануваат во опозиција“, пишува во реакцијата.