Шумски пожар уништи десетици домови во Австралија

Шумски пожар кој гори североисточно од Перт во западна Австралија уништи 30-ина домови и продолжува да се шири. Локалните жители од целиот регион тврдат дека е предоцна за заминување, пренесува АП.

Пожарот, кој започна во понеделникот, зафати повеќе од 7.000 хектари земја во радиус од 75 километри во близина на градот Вуролу, а зафати и неколку блиски места.

Кевин Бејли, градоначалник на Свон, рече дека над 30 куќи биле уништени во пожарот и дека еден пожарникар бил пренесен во болница поради вдишување чад, како и дека никој друг не е повреден.

Властите во Западна Австралија тврдат дека областа погодена од пожарот се зголемила двојно во текот на ноќта, а пожарникарите ќе испитаат дали има жртви.