Црна Гора воведува построги мерки, бројот на заразени од коронавирус расте

Здравствените власти на Црна Гора ќе предложат поостри мерки откако вчера беа регистрирани 65 нови случаи на коронавирус, најмногу за еден ден во последните два месеци. Во средината на април, Црна Гора започна со укинување на епидемиолошките мерки кои беа целосно либерализирани на почетокот на летната туристичка сезона.

Поради падот на бројот на пациенти, Црна Гора скоро целосно ги укина сите епидемиолошки мерки, освен што за концерти, ноќни клубови и други масовни собири треба да се поседува потврда за вакцинација или негативен ПЦР тест.

Бидејќи повеќето од новозаразените случаи се во туристички дестинации, здравствените власти им се заканија на сопствениците на кафулиња и ресторани дека кршењето на епидемиолошките мерки ќе биде строго казнето со парични казни и затворање на установите за три дена.

Доколку некоја институција ги прекрши епидемиолошките мерки неколку пати, таа ќе биде затворена од 15 до 30 дена, соопшти Министерството за здравство.

Според владините податоци, повеќе од 100.000 туристи во моментов престојуваат во земјата.

Сепак, Министерството за здравство смета дека епидемиолошката состојба во моментов е стабилна со просечно 30 нови случаи од Ковид-19, што е помеѓу 1,5 и 2,3 проценти од испитаните дневно.

Црна Гора не потврди присуство на делта-сојот на нејзината територија, но епидемиолозите предупредуваат дека наглото зголемување на бројот на пациенти може да укаже на појава на нова, поопасна варијанта.

Повеќе од 35 проценти од возрасната популација примиле две дози вакцина, повеќе од 100. 000 или 15 проценти од популацијата се заразиле со коронавирус, а 1.683 луѓе починале.