Првиот „плен“ на новиот Њукасл ќе биде Филипе Кутињо?

Њукасл јунајтед во јануари ќе се обидат да го вратат Филипе Кутињо во Премиерлигата како прв голем трансфер на новите саудиски газди, тврди каталонскиот „Спорт“, додавајќи дека веќе се направени првите контакти.

Њукасл беше продаден за 305 милиони фунти на саудискиот инвестициски фонд ПИФ, а новиот претседател на клубот, Јасир Ал-Румајан со писмо се обрати до навивачите ветувајќи дека имаат големи амбиции да направат тим на кој фановите ќе бидат горди. Без да се прекршат правилата за финансискиот ферплеј (ФФП), Њукасл ќе може да потроши над 200 милиони фунти во следните три години.

Според „Спорт“, ПИФ веќе ова лето контактирале со Кутињо, но не дошло до договор поради тоа што уште не беше потврдено преземањето на клубот. 29-годишниот Бразилец, кој е поранешен фудбалер на Ливерпул, дојде на „Ноу Камп“ во договор од над 150 милиони евра, но има само 96 настапи за Барселона, а една сезона помина на позјамица во Баерн Минхен. Во Каталонија се очајни да ги намалат трошоците, и Кутињо, кој заработува 200.000 фунти неделно, е еден од тие кои имаат зелено светло да заминат.