ВМРО-ДПМНЕ: Шилегов сече дрвја за да му се гледаат билбордите

Се моли Шилегов да не зборува за дрвја во Скопје, бидејќи ги исече за да му се гледаат билбордите, обвинија денеска од ВМРО-ДПМНЕ.

„За дрвореди и за дрвја е лицемерно кога зборува Шилегов, бидејќи тој е човекот што сече дрвја за да се гледа билбордот на Филип Темелковски. Шилегов е човекот под чија наредба беа исечени дрворедите на улицата Орце Николов и со чија дозвола се пустошат сите зелени површини“, сметаат од партијата.

Од таму додаваат дека Скопје руши рекорди по загаденост секоја зима и е на врвот на светските листи на градови со најзагаден воздух.

„Минатата зима загадувањето беше намалено поради рестриктивните мерки за движење на граѓаните и карантинот за време на викендите“, велат од ВМРО-ДПМНЕ од каде сметаат дека тезата на Шилегов оти се намалило загадувањето е несоодветна.

Од таму додаваат и дека за субвенциите за инвертер клими, Шилегов допрва ќе треба да одговори.

„По кој принцип се делени и зошто наместо во приградските населби каде што има потреба, тие се делени во Центар на лица кои живеат на улица Македонија и строгиот центар на градот“, прашуваат од ВМРО-ДПМНЕ.