Роналдо со ќерката во прегратка по загубата синот: Засекогаш љубов

Кристијано Роналдо објави слика како ја држи во прегратка својата ќерка. Сликата ја сподели на Инстаграм две недели откако таа се роди, а нејзиниот брат близнак почина при раѓањето. „Засекогаш љубов“, напиша португалскиот фудбалер на црно белата фотографија и доби преку 16 милиони лајкови.

Роналдо и неговата партнерка Георгина за сега не го откриваат името на девојчето. Таа се роди на 18 април. Во емотивна објава Кристијано тогаш напиша дека неговиот син не преживеал и покрај напорите на лекарите, а дека болката е најголемата што еден родител може да ја почувствува.

„Само раѓањето на нашето девојче ни дава сила да го живееме овој момент со малку надеж и среќа. Сите сме уништени од оваа загуба. Нашето машко бебе е нашиот ангел. Секогаш ќе го сакаме“, напиша тогаш Роналдо.

Откако Георгина се врати од болница, Роналдо сподели прва семејна слика со сите деца.

„Доме сладок доме. Џио и нашето девојче конечно се заедно со нас. Сакаме да им се заблагодариме на сите за сите убави зборови и гестови. Вашата поддршка ни е многу важна и сите ја почувствувавме љубовта и почитта што ја имате кон нашето семејство. Сега е време да бидеме благодарни за животот што штотуку го дочекавме на овој свет“.

Брзо потоа, тој се врати на фудбалот, а првиот гол што го постигна му го посвети на починатиот син.