(Видео) Несреќа на Скијатос- сериозно повредена жена која снимала полетување на авион

Несреќа се случи на аеродромот во Скијатос каде што туристите и локалните жители се собираат да го гледаат полетувањето на авионите.

Туристката (61) сакала да го снима авионот додека полетува, но издувните гасови ја собориле и ја фрлиле во морето.

На видеото се гледа дека, жената била на патот покрај морето, на само неколку метри од ѕидот и почетокот на пистата. Во моментот кога авионот полетал, таа ги кренала рацете, а не долго потоа воздушната сила од турбината ја фрлила неколку метри во морето.

Лекарите од локалниот Здравствен дом констатирале дека таа се здобила со сериозни повреди на главата, карлицата и модринки на десното рамо и левиот зглоб, а жената со брод е пренесена во болницата во Волос, најблискиот град на копното.

Ова е втора ваква несреќа во последните неколку недели.

Меѓународниот аеродром Скијатос Александрос Пападиамантис е познат по ниските слетувања и е исклучително популарна дестинација за секој кој сака да гледа полетувања или слетувања и да фотографира.

И покрај поставените знаци и предупредувањата од властите да се држат подалеку од областа околу пистата на аеродромот, многу туристи се приближуваат за да направат слики или видео од леталото што се приближува.