Евросонг во САД, Канада и Латинска Америка: Европскиот фестивал се шири низ светот, а Македонија догодина може да не учествува

Евросонг од 2023 ќе се одржува и во Латинска Америка, откако годинава првпат се одржа во САД, а и Канада најави дека догодина првпат ќе го организира изборот. Европската радиодифузна унија (ЕБУ), која е организатор на најголемиот музички фестивал во Европа, вели дека поради големиот интерес за песните во Аргентина, Бразил, Чиле и Мексико, решиле да го организираат шоуто и таму.

МРТ, кој е организатор на домашниот избор, најави дека Македонија догодина можеби нема да се натпреварува, откако Андреа го фрли знамето на отворањето на Евровизија и предизвика негативни реакции во јавноста.

Продуцентите од ЕБУ открија дека веќе бараат град домаќин во Латинска Америка.

„По започнувањето на американскиот натпревар за песна на Евровизија и со плановите за Евросонг во Канада следната година, ЕБУ е воодушевена што сега работи со Vocovation за да ја донесе возбудата и магијата на натпреварот за песна на Евровизија во Латинска Америка. Уникатниот формат на Евросонг секоја година наоѓа нови фанови ширум светот и едвај чекаме да го прошириме брендот во овој исклучително разновиден дел од светот“, пишува во соопштението на извршниот супервизор на Евросонг, Мартин Остердал.

Изборот за песна на Евровизија Латинска Америка ќе биде продуциран од Vocovation, продуцентот на американското и канадското натпреварување за песна на Евровизија.

„Фановите ширум Латинска Америка постојано се појавуваа и се покажаа идеални за брендот за песна на Евровизија, а Латинска Америка ја отелотворува таа огнена страст, како и продолжување на широката визија што ние, продукцискиот тим, ја имаме за Евросонг како глобален бренд“, велат од продуцентскиот тим на Vocovation.

Сè уште нема информации како ќе изгледа натпреварување во Латинска Америка, како ќе се одвива гласањето и дали шоуто ќе се емитува на шпански и/или португалски во Бразил. Организаторите велат дека во моментов ги разработуваат деталите за шоуто.