Во ирскиот Грејстоунс, мал град со околу 18.000 жители, иницијативата на родителите вроди со плод, па децата нема да добиваат мобилни телефони за користење додека се во основно училиште.


Здруженијата на родители од осум основни училишта во ирскиот град Грејстоунс заеднички покренаа иницијатива во обид да го подобрат квалитетот на детството и образованието на нивните деца. Нивната доброволна колективна иницијатива сугерираше дека на децата не треба да им се дозволува да имаат телефони додека се во основно училиште.

Идејата е мотивирана од фактот што родителите и наставниците се загрижени поради зголемената инциденца на анксиозност кај децата, како и предвременото изложување на содржини наменети за возрасни.

Доброволна одлука

Иницијативата на родители „It Takes a Village“ ја поддржаа и училиштата, па ќе се реализира – на децата по правило до 13 години нема да им се даваат телефони ниту на училиште, ниту дома. Почитувањето нема да биде задолжително, туку секој родител ќе пристапи по сопствена одлука, но важно е дека доволно луѓе веќе решиле да поддржат ваква одлука, велат организаторите.

Се надеваат дека таквиот став ќе преовлада, односно дека ќе се создаде критична маса и забраната за телефони за основците ќе стане вообичаена практика.

Иницијативата ја поздравија и родителите кои имаат проблем со спроведувањето на ваквата одлука, бидејќи забележаа позитивни ефекти. „Штом 90% од класот ќе се согласат за ова, ќе ми биде полесно да му кажам не на моето дете“, рече една мајка на 11-годишно момче. Други родители велат дека „поради TikTok и слично“ ги изгубиле своите деца, односно дека се зафатени со користење на технологија цел ден наместо да учествуваат во семејниот живот.

Откако одредени училишта почнаа да ги забрануваат телефоните, се појави оваа локална иницијатива да ги забрани за децата воопшто. Откако целата работа ќе започне во заедницата Грејстоунс, иницијаторите се надеваат дека практиката ќе се прошири во остатокот од Ирска и ќе има позитивно влијание врз благосостојбата на децата.

„Детството станува се пократко и пократко, а имаме чувство дека многу деца сè уште не се емотивно подготвени да поседуваат паметни уреди“, посочува директорката на иницијативата Рејчел Харпер, која е и директорка на локално училиште.