пред 12 месеци 
Можеби изгледа бизарно, но оваа зима многумина почнаа да го копираат скандинавскиот стил на воспитување, кој вклучува оставање на бебињата и малите деца да спијат на отворено, односно на ниски температури. Луѓето ширум светот ја прифаќаат идејата дека нивните деца ќе спијат подобро благодарение на студот, па Инстаграм и Тик-ток се преплавени со видеа на оваа тема.
Во клиповите што ги споделуваат родителите, бебињата се во топли колички и спијат пред кафулињата и парковите. Други ги одржуваат детските соби поладни со отворање на прозорци или со вклучување климатизери.
Оваа практика е доста честа појава во нордиските земји, а е стара повеќе од 100 години. Поточно, почна да се практикува откако епидемијата на туберкулоза, која го зафати Исланд на почетокот на 20 век, беше отежната со лошата вентилација на станбените згради.
Во 1926 година, исландскиот лекар Дејвид Торштајнсон објавил педагошка книга во која тврди дека родителите треба да ги остават своите деца да спијат надвор во своите колички за да добијат свеж воздух, дури и на ладно време, за да го зајакнат нивниот имунолошки систем.
Традицијата се пренесува од генерација на генерација, а вообичаено е да се видат колички со заспани бебиња паркирани пред куќи, станови, па дури и локални бизниси во земји како Норвешка, Данска и Исланд.
Една американска мајка која живее во Данска објасни: „Данската практика, бебињата да спијат надвор во колички не е само културна норма, туку дури и препорачана од акушерките и медицинските сестри“.
Се вели дека свежиот воздух ги одржува бебињата здрави и им помага да спијат подобро, а дремењето на отворено се практикува на сите временски услови.
„Вообичаено е да го оставите бебето да дреме надвор додека одите во шопинг или седите во кафуле. Родителите секогаш внимаваат или имаат бебе монитор во количката. Бебињата не се киднапираат затоа што никој не сака да одговара за туѓото дете, особено кога здравствениот систем прави сè што може за да му помогне на секој што сака да има свое бебе по малку или без трошоци“, рече таа.
Децениските истражувања го поврзуваат изложувањето на студ со безброј бенефиции, вклучително и зајакнување на имунолошкиот систем, додека едно финско истражување од 2008 година покажа дека децата „дремеат подолго надвор во споредба со дремките во затворени простории“.
Сепак, постои ризик од хипотермија во студено време, експертите велат дека од клучно значење е децата да бидат добро облечени и завиткани во топли слоеви кога се надвор.
„Температурата на бебињата може да падне четири пати побрзо од возрасните и тие да станат хипотермични“, вели педијатарот Џенифер Шу.
Родителите долго време веруваа дека престојот на отворено е од суштинско значење за нивните деца, а во раните 1900-ти, на пример, некои од третманите за туберкулоза беа свеж воздух и одмор. Илјадници болни деца беа испратени во училиштата на отворено кои беа отворени низ Велика Британија, Европа и Америка во годините пред Втората светска војна.
Движењето се заснова на концептот дека свежиот воздух, добрата вентилација и изложеноста на отворено може да го спречат ширењето на туберкулозата и да го подобрат здравјето на пациентите. Движењето започна во Германија со отворањето на Шумското училиште за болни деца во Берлин во 1904 година, кое беше дизајнирано да се бори против туберкулозата.
Наскоро тие беа прифатени од другите градови. Првото отворено училиште во Англија било изградено во Бостал Вуд, Лондон во 1907 година, а првото училиште на отворено во Њујорк започнало во 1908 година на напуштен траект.
Меѓутоа, по Втората светска војна, ставовите кон училиштата на отворено драматично се променија. Животниот стандард се подобри и беа воведени нови третмани, вклучително и антибиотици, што доведе до намалување на случаите на туберкулоза.