Владимир Кецмановиќ ја негира вината за малтретирање и запоставување на својот син: продолжува судењето за случајот „Рибникар“

Во Вишиот суд во Белград, денеска, со излагање на одбраната продолжи судењето на Милјана и Владимир Кецмановиќ, родителите на момчето, кое на 3 мај минатата година уби девет врсници и чувар во основното училиште „Владислав Рибникар“.

Како што пренесуваат белградските медиуми, Владимир Кецмановиќ негира дека сторил кривично дело злоупотреба и запуштање малолетно дете за што тој и неговата сопруга беа обвинети од Вишото јавно обвинителство во Белград.

Тој одби да одговори на прашањата на обвинителите и адвокатите.

Судијата направи пауза по што судењето продолжува. По него, за новото обвинение треба да сведочи и Милјана Кецмановиќ.

Обвинителството го прошири обвинителниот акт со кој Владимир Кецмановиќ се товари за кривично дело тешко дело против општата безбедност, а мајката за кривично дело недозволено држење и носење оружје, јавува „Танјуг“.

Милјана Кецмановиќ во судот пристигна од слобода, а нејзиниот сопруг беше изведен од притвор, каде што се наоѓа од апсењето на 3 мај минатата година.

Проширениот обвинителен акт следува по распитот на малолетниот сторител на убиството на К. К. Во овој случај им се суди на родителите на момчето, Владимир и Милјана Кецмановиќ, и на инструкторот на стрелиштето, Немања Маринковиќ, кој е обвинет за кривично дело давање лажен исказ.

Текстот Владимир Кецмановиќ ја негира вината за малтретирање и запоставување на својот син: продолжува судењето за случајот „Рибникар“ е превземен од МАКФАКС.