Јапонскиот гејмерски гигант Nintendo доби уште една правна битка во борбата против пиратеријата.


Американскиот суд пресуди во корист на Nintendo, наложувајќи им на сопствениците на онлајн продавницата Modded Hardware да престанат да дистрибуираат модифицирани Switch уреди и да му платат на Nintendo 2 милиони долари отштета.

Со години, продавницата нудеше хардверски алатки и додатоци што им овозможуваа на корисниците да ја заобиколат заштитата на конзолите Switch, олеснувајќи им на корисниците да извршуваат пиратски копии од игри. Судот пресуди дека ова е директно кршење на авторските права и Законот за дигитални авторски права (DMCA).

Ова не е прв пат Nintendo успешно да преземе правни мерки за да ги спречи ваквите активности. Во март оваа година, компанијата постигна спогодба со тимот на програмери Yuzu, познат по истоимениот емулатор на игри Switch за PC. Договорот вклучуваше трајно исклучување на емулаторот и исплата на отштета од 2,4 милиони долари.

Nintendo е познат по својот агресивен пристап кон заштитата на интелектуалната сопственост, особено кога станува збор за пиратерија и дистрибуција на софтвер што овозможува неовластено користење на игри. Во последниве години, беше вклучен во бројни тужби против хакери, развивачи на емулатори и онлајн продавници кои нудеа начини за заобиколување на заштитата.

Експертите веруваат дека најновата пресуда е уште еден сигнал дека Nintendo нема да попушти во оваа област и дека ќе продолжи да спроведува строга политика против секој што се обидува да монетизира од нелегални алатки или содржина поврзана со конзолата Switch.