Астронаут од Германија ќе биде првиот од Европа што ќе патува на Месечината

Првиот Европеец во една од идните мисии на американската агенција НАСА на Месечината ќе биде од Германија, а подоцна астронаути од Франција и Италија ќе ги следат неговите стапки.

Ова го објави генералниот директор на Европската вселенска агенција (ЕСА), Јозеф Ашбахер, во Бремен, Германија, каде што се одржува состанок на Советот на ЕСА, објави АФП.

ЕСА придонесува во американската програма „Артемис“ за враќање на човекот на Месечината со изградба на вселенското летало „Орион“ и компоненти за идната станица што ќе орбитира околу Месечината.

Одложувана неколку пати, мисијата на НАСА со екипаж за летање околу Месечината – „Артемис 2“, со приватни партнери како што е SpaceX, е закажана за почетокот на следната година, 2026 година, најдоцна во април, така што за време на десетдневното патување, четири астронаути ќе го тестираат вселенското летало „Орион“.

Ова би бил клучен чекор за враќањето на Американците на Месечината, што американскиот претседател Доналд Трамп го најави како итно, за време на неговиот прв мандат во 2017-2021 година.

Следната мисија „Артемис 3“ – првата по 1972 година што ќе спушти двајца астронаути на површината на Месечината, каде што треба да проверат дали навистина има замрзната вода, е планирана за 2027 или 2028 година.

За САД е важно ова да се случи пред Кина да го постигне тоа, чија цел е нивниот астронаут да слета на Месечината до 2030 година.

Фото: ЕПА