„Тажен кактус“: Норвешка се брани по бранот критики за новогодишната елка во Лондон

Норвешкиот министер за надворешни работи Еспен Барт Ајде одговори на бранот критики што се појавија во британската јавност во врска со елката што Норвешка традиционално ја донира на Лондон и која беше поставена на плоштадот Трафалгар.

Во некои британски медиуми и на социјалните мрежи, изгледот на елката беше оценет како разочарувачки, со иронични споредби со „тажен кактус“ и тврдења дека елката изгледа како да е зафатена од „торнадо“. Сепак, Ајде нагласи дека станува збор за симбол чија вредност далеку ги надминува естетските впечатоци.

Тој потсети дека елката е „непроценлив подарок“ и дел од традицијата што трае од 1947 година, кога Норвешка за прв пат ѝ ја подари елката на Велика Британија како знак на благодарност за нејзината поддршка за време на Втората светска војна. Според него, елката е исто така симбол на долгорочно партнерство и пријателски односи меѓу двете земји.

„Многу сме горди на нашата елка и на оваа традиција“, рече Ајде, нагласувајќи дека значењето на овој гест не може да се мери само со визуелни впечатоци.

Фото: депозитфотос

Текстот „Тажен кактус“: Норвешка се брани по бранот критики за новогодишната елка во Лондон е превземен од МАКФАКС.