(Видео) Болидот на Астон Мартин претставува ризик по здравјето на возачите

Шефот на Астон Мартин, Адриан Њуи, презентираше загрижувачки информации пред трката за Големата награда на Австралија, која овој викенд ќе го отвори овогодинешниот шампионат во Формула 1.

Њуи откри дека возачите на тимот, Фернандо Алонсо и Ленс Строл, ризикуваат трајно оштетување на нервите во рацете поради силните вибрации во автомобилот.

Тимот од Силверстоун имаше проблеми со новиот автомобил „AMR26“, дизајниран од Њуи, за време на предсезонските тестирања.

Најголемиот предизвик беше сигурноста на погонската единица на Хонда.

Поради ова, тимот и јапонскиот производител работеа интензивно во Велика Британија и Јапонија за да ги решат проблемите, кои главно се поврзани со силни вибрации што предизвикуваат откажување на батеријата во погонската единица.

Дури имаше гласини дека Астон Мартин ја разгледува можноста двата автомобила да се повлечат рано од трката, а Њуи донекаде ја потврди таа можност.

A first look at the Adrian Newey-designed Aston Martin AMR26 on track at Barcelona! #F1 pic.twitter.com/uhmuo3GRET

— Formula 1 (@F1) January 30, 2026

„Овие вибрации што влегуваат во шасијата предизвикуваат неколку проблеми со сигурноста – паѓање на ретровизори, задни светла и слични работи, на кои мора да се осврнеме“, изјави Њуи за новинарите во Мелбурн.

„Фернандо верува дека не може да вози повеќе од 25 последователни круга без да ризикува трајно оштетување на нервите во рацете. Ленс верува дека кај него тој праг доаѓа уште порано, по 15 круга. Затоа, ќе мора сериозно да го ограничиме бројот на кругови што можеме да ги возиме во трката, сè додека не ја решиме причината за вибрациите“.

Со оглед на тоа што на „Алберт Парк“, во трката се возат 58 круга, тоа значи дека возачите на Астон Мартин нема да можат да возат ниту половина од трката.

Foto/ depositphotos