„АС“: Барселона – Реал Мадрид 8:0

Списокот за СП 2026 на шпанскиот селектор Луис де ла Фуенте постави историски преседан: за прв пат од 1930 година, на него нема ниту еден играч на Реал Мадрид. Ситуацијата е сосема спротивна во таборот на најголемиот ривал, бидејќи дури осум фудбалери на Барселона ќе учествуваат на првенството, што е втор најголем број во историјата на клубот, пишува „АС“ во текстот насловен: „Барселона – Реал Мадрид 8:0“.

Одлуката на селекторот Де ла Фуенте претставува остар контраст со претходната практика. Шпанија имаше двајца играчи на Реал во Катар во 2022, а само еден во Бразил во 1950 година, денешната листа е прва во историјата без ниту еден претставник на „кралскиот клуб“.

Од друга страна, со осум избрани играчи, Барселона го бележи својот втор најуспешен пласман на светските првенства. Пред 32 години, девет играчи на Барселона патуваа на Светското првенство во 1994 година во Соединетите Американски Држави.

Пред објавувањето на списокот, седум играчи на Реал Мадрид се сметаа за можни кандидати. Сепак, Карвахал, Асенсио, Карерас и Себаљос, во ниту еден момент не беа во сериозна конкуренција, бидејќи претходно беа изоставени од прелиминарниот список од 55 играчи. Со тоа останаа само тројца во игра: Хаусен, Фран Гарсија и Гонзало Гарсија.

Најголемо внимание привлече Дин Хаусен, најскапиот дефанзивец во историјата на Реал Мадрид, платен 60 милиони долари. Од дебито за Шпанија, во март 2025 година, тој никогаш не бил изоставен од тимот.

Во последните денови се шпекулираше дека неговото место не е сигурно. Кубарси, Лапорт и Пубил се сметаа за сигурни патници, што остави само едно слободно место за кое се бореа Хаусен, Џоан Мартин, Ле Норманд, Москера и Ерик Гарсија. На крајот, тоа место му припадна на Ерик Гарсија.

Додека Реал Мадрид нема претставници, Барселона има осум: Џоан Гарсија, Кубарси, Ерик Гарсија, Педри, Гави, Дани Олмо, Ламин Јамал и Феран Торес. Гледајќи ја историјата на 17-те Светски првенства од 1930 година, Реал Мадрид обично доминирал во ова конкретно „Класико“.

Клубот од Мадрид имал повеќе играчи во националниот тим осум пати, Барселона седум пати, додека двапати биле нерешени. До денес, најмалиот придонес на Реал бил во 1950 година во Бразил, кога само Моловни бил во тимот.

За споредба, секогаш најмалку тројца фудбалери на Барселона биле на спискот. Интересно е што низ историјата, Барселона обезбедила вкупно 93 играчи за светските првенства, додека Реал Мадрид обезбедил 75.