(ВИДЕО) Роботи во Кина заиграа српско оро „Моравец“: Србија најавува фабрика за хуманоидни роботи

Необична сцена која изгледа како дел од научнофантастичен филм деновиве привлече големо внимание на социјалните мрежи, откако министерот за финансии на Србија, Синиша Мали, објави видео од Кина на кое хуманоидни роботи играат српско народно оро „Моравец“.

Видеото е снимено за време на официјалната посета на српската делегација во Кина, каде Мали го посетил иновативниот центар на кинеската компанија Minth Future Factory. Роботите на снимката синхронизирано ги изведуваат чекорите на традиционалното српско оро, што предизвика бројни реакции и коментари на интернет.

„Во Кина многу работи се можни, па дури и роботите да играат „Моравец“, во што и самите се уверивме“, напиша Мали во објавата на својот Инстаграм профил.

Министерот откри и дека Србија наскоро ќе влезе во нова технолошка фаза, бидејќи според најавите првата фабрика за хуманоидни роботи треба да започне со работа во земјата за само неколку месеци.

Според неговите информации, планот е овие роботи во иднина да имаат и посебна улога за време на меѓународната изложба EXPO 2027 во Белград, каде би ги пречекувале посетителите и би биле дел од технолошката презентација на земјата.

Во Кина престојува и српскиот претседател Александар Вучиќ, кој дополнително откри дека првата фаза од производството нема целосно да се однесува на развој од нула, туку првично ќе опфати склопување на хуманоидни роботи во Србија.

„До 15 јули треба да започне првата фаза на склопување на хуманоидните роботи во Србија“, изјавил Вучиќ.

Оваа најава се смета за дел од пошироката соработка меѓу Србија и Кина во областа на технологијата, индустријата и иновациите. Хуманоидните роботи последните години стануваат сè позастапени во светот – од работа во фабрики и логистички центри, до услуги, образование и интеракција со луѓе.

Видеото со роботите кои играат „Моравец“ за кратко време стана вирално, а многумина коментираа дека сцените покажуваат како иднината која до неодамна изгледаше далечна, веќе станува реалност.

ВИДЕОТО ПОГЛЕДНЕТЕ ГО ТУКА