Заминаа во ветар 6 милиони евра: Белгиец не си ја подигна новогодишната лото-добивка

Со години, милиони луѓе ширум светот сонуваат за истиот момент – денот кога нивното ливче ќе им донесе животна промена и милионска добивка на лотарија. Додека некои редовно вложуваат големи суми верувајќи во среќата и статистиката, мнозинството сепак игра само повремено, издвојувајќи по неколку евра со надеж дека токму тој мал влог може да им го преврти животот наопаку.

Но, иако речиси сите сонуваат за голема добивка, неверојатните приказни понекогаш покажуваат дека постојат и такви кои освоените пари никогаш не ги подигнуваат. Токму ваков случај деновиве предизвика големо внимание во Белгија.

Добитното ливче уплатено за Нова година

Националната лотарија на Белгија објави дека од 1 јули, па сè до крајот на годината, ќе го зголеми почетниот џекпот од сегашниот еден милион на дури 1,5 милиони евра. Причината за оваа несреќна, но за останатите играчи среќна одлука, се крие во фактот што добитникот на дури шест милиони евра – освоени кон крајот на декември минатата година – никогаш не се појавил да си ги земе парите.

Добитното ливче било потврдено во белгискиот град Бланкенберге за време на специјалното новогодишно извлекување, но среќникот (или несреќникот) до денес остана анонимен и не ја побара наградата. Иако повремено се случува играчите да заборават да подигнат помали износи од неколку евра или десетици евра, ваков случај е исклучително редок кога станува збор за огромна, милионска сума.

Каде завршуваат неискористените милиони?

Од Националната лотарија наведуваат дека секоја година се акумулираат неколку милиони евра од непреземени помали добивки, главно затоа што играчите ги губат ливчињата, забораваат да ги проверат резултатите или едноставно не забележуваат дека освоиле нешто. Сепак, ситуацијата со шест милиони евра предизвика огромно изненадување дури и кај самите организатори.

Поради тоа, донесена е одлука непреземениот џекпот повторно да им се врати на играчите преку идните извлекувања. Така, секој нов џекпот по освојувањето на главната награда, наместо од досегашниот еден милион евра, ќе стартува со износ од 1,5 милиони евра, што дополнително би можело да го зголеми интересот за играта во текот на летните месеци, пишува RTL.be.

Апел за редовна проверка на ливчињата

Белгиската лотарија ја искористи оваа прилика уште еднаш да ги предупреди граѓаните колку е важно редовно да ги проверуваат своите ливчиња – било онлајн, преку апликации или директно на продажните места. Организаторите истакнуваат дека многу играчи често забораваат на уплатите, па така голем број ливчиња остануваат заборавени во џебовите, паричниците или во фиоките со месеци по извлекувањето.

Оваа необична приказна уште еднаш покажа колку е тенка границата меѓу сонот и реалноста. Додека милиони луѓе секојдневно фантазираат за големата добивка, некаде во Белгија можеби сè уште шета личност која поим нема дека преку ноќ станала милионер.