Во јуни нè очекува реконструкција на Владата, ќе разговараме со нашите коалициони партнери, кажа Мицкоски за оставката на Фетаи

Премиерот Христијан Мицкоски денеска одговарајќи на новинарско прашање за оставката на вицепремиерот за добро владеење, Арбен Фетаи, потенцира, дека истата ќе биде архивирана утре, и потсети дека во јуни ќе има реконструкцијата на Владата.

„Jас неколку пати во минатото зборував дека ние разговаравме. Господинот Фетаи поднесе оставка денеска, таа ќе биде архивирана утре. Така што, како што знаете, во јуни нè очекува реконструкција на Владата, и ќе видиме ќе разговараме со нашите коалициони партнери во рамките на Владата“, кажа Мицкоски.

Тој наведе дека Фетаи во оставката се заблагодарува за работата со него како премиер, како и со останатите колеги во рамките на Владата.

На прашањето кога ќе биде реконструкцијата на Владата премиерот кусо одговори дека јавноста во соодветно време ќе биде информирана за сите детали околу реконструкцијата.

Претходно денеска на социјалните мрежи Фетаи објави дека поднел оставка од функцијата и ја доставил до премиерот Христијан Мицкоски. Во напишаното, Фетаи вели дека од функцијата заминува со крената глава и чиста совест.

Текстот Во јуни нè очекува реконструкција на Владата, ќе разговараме со нашите коалициони партнери, кажа Мицкоски за оставката на Фетаи е превземен од МАКФАКС.