Џенифер Лопез и Брет Голдстин имале љубовна авантура за време на снимањето на „Office Romance“

Американската пејачка и актерка Џенифер Лопез и британскиот актер Брет Голдстин наводно имале романтична врска за време на снимањето на новата романтична комедија „Office Romance“, но нивната блискост со текот на времето прераснала во пријателство, објавува „Page Six“, повикувајќи се на анонимен извор близок до актерите.

Според изворот, Лопез и Голдстин успеале да останат професионални на снимањето, но нивната меѓусебна хемија била очигледна за целиот тим.

„Се обидуваа да ја задржат врската далеку од очите на јавноста додека траеше снимањето, но често флертуваа на сетот и беше јасно дека меѓу нив постои силна поврзаност“, изјавил изворот. Тој додава дека присутните на завршната забава по снимањето забележале дека двајцата биле особено блиски и дека меѓусебната привлечност не можела да остане незабележана.

Наводно, нивното дружење започнало уште во почетокот на 2025 година, кога заедно присуствувале на бродвејската претстава „Oh, Mary!“ во Њујорк. По завршувањето на снимањето, тие добиле повеќе простор да се запознаат надвор од работните обврски и извесен период биле во романтична врска.

„Уживаа во времето што го поминуваа заедно и Брет ја правеше Џенифер среќна. Но, по некое време работите едноставно почнаа да губат интензитет“, тврди истиот извор.

Според неговите информации, врската завршила без конфликти и без негативни чувства меѓу нив.

„Нема никаква лоша крв меѓу нив. Едноставно, романтичната искра постепено исчезна. И понатаму имаат добро пријателство, но љубовната приказна остана во минатото“, наведува изворот.

Тој додава дека меѓу нив постоела силна физичка привлечност, но со текот на времето сфатиле дека подобро функционираат како пријатели отколку како партнери.

Претставниците на Џенифер Лопез и Брет Голдстин засега не ги коментираа овие наводи.

Интересно е што уште кога беше објавено дека двајцата ќе глумат заедно во филмот „Office Romance“, кој премиерно ќе биде прикажан на 5 јуни на Нетфликс, обожавателите потсетија на долгогодишната симпатија што Голдстин јавно ја покажувал кон Лопез.

Британскиот актер, познат по улогата во серијата „Ted Lasso“, во повеќе наврати на својот подкаст „Films to Be Buried With“ зборувал со восхит за Џенифер Лопез. Во една епизода од 2018 година, коментирајќи го нејзиниот изглед во филмот „Hustlers“, тој изјавил: „Неверојатно. Има 50 години. Ја обожавам.“

Гласините за нивната можна романса повторно се разгореа оваа недела кога двајцата гостуваа во емисијата „Today Show“. Водителката Савана Гатри директно ги праша дали шпекулациите за нивната хемија надвор од екранот се точни.

Лопез одговори дека секогаш кога е видена со некого или работи со некого, јавноста веднаш се обидува да ја поврзе романтично со таа личност. Кога водителката оцени дека тоа не е директен одговор на прашањето, пејачката кратко изјави: „Не сме во врска“, по што Голдстин потврди со зборовите: „Точно.“

И покрај демантот за актуелна романса, извори блиски до продукцијата тврдат дека меѓу двајцата навистина постоела блискост за време на снимањето, но денес нивниот однос се сведува на добро пријателство и меѓусебна почит.