Тајра Бенкс го тужи Netflix: Тврди дека документарецот ја прикажал во лажно светло и ѝ го нарушил угледот

Поранешната супермоделка, водителка и креаторка на култното шоу „America’s Next Top Model“, Tyra Banks, покрена тужба против Netflix поради документарната серија „Reality Check: Inside America’s Next Top Model“, обвинувајќи ја платформата дека преку манипулирани и извадени од контекст снимки создала „лажен и клеветнички наратив“ за нејзината улога во контроверзиите поврзани со шоуто.

Според тужбата, Бенкс смета дека документарната серија намерно ги исекла деловите во кои таа признава одредени грешки и презема одговорност, додека останатите изјави биле монтирани на начин што создава впечаток дека таа лично стоела зад сите спорни одлуки во продукцијата.

„Многу клипови беа извадени од контекст и повторно составени за да поддржат лажен и клеветнички наратив“, се наведува во тужбата, пренесуваат американските медиуми.

Документарецот ги отвори старите рани

Серијата „Reality Check: Inside America’s Next Top Model“ се занимава со бројни обвинувања кои со години го следат популарното реално шоу, меѓу кои се обвинувања за психолошки притисок врз натпреварувачките, засрамување поради физичкиот изглед, како и контроверзии поврзани со расни стереотипи.

Едно од најсериозните сведоштва доаѓа од поранешната натпреварувачка Shandi Sullivan, која тврди дека за време на снимањето во Италија во 2003 година била во алкохолизирана состојба и дека продукцијата требало да интервенира.

Бенкс, пак, тврди дека во интервјуто јасно објаснила дека не учествувала во конкретните продукциски одлуки, но дека документарецот оставил впечаток дека таа е директно одговорна за случувањата.

„Оваа приказна за г-ѓа Бенкс е целосна измислица што Netflix ја емитуваше пред милионска публика ширум светот“, се наведува во поднесокот.

Поранешни натпреварувачки со нови обвинувања

Документарецот ги отвора и другите контроверзни моменти од шоуто.

Победничката на третата сезона, Dani Evans, зборува за притисокот што го чувствувала да го затвори јазот меѓу предните заби за да биде „покомерцијална“, додека Keenyah Hill открива дека нејзината телесна тежина била претворена во телевизиска приказна која негативно влијаела врз неа.

Бенкс признава грешки, но не и целосна вина

И покрај судскиот спор, Тајра Бенкс не ги негира сите критики кон шоуто.

Во документарецот таа се осврнува на неколку моменти кои предизвикаа бурни реакции кај јавноста, вклучувајќи ја и легендарната сцена во која ѝ се развика на натпреварувачката Tiffany Richardson.

„Отидов предалеку. Го изгубив трпението“, призна Бенкс.

Таа исто така призна дека денес поинаку гледа на контроверзната фотосесија во која натпреварувачките беа шминкани за да изгледаат како припадници на други раси.

„Сто проценти разбирам зошто тоа денес се смета за проблематично“, изјавила таа.

На церемонијата на наградите ESSENCE Black Women in Hollywood Awards 2025, Бенкс отворено изјави:

„Дали направивме сè како што треба? Не, ни одблиску. Кажав и некои глупави работи.“

„Нема да дозволам моето наследство да се сведе на неколку клипови“

И покрај признанијата, Бенкс остро реагира на обидите целото наследство на шоуто да се дефинира преку неговите најконтроверзни моменти.

„Одбивам моето наследство да се сведе на неколку работи што кружат на интернет, кога зад нас стојат 24 циклуси кои оставија огромно влијание и променија многу животи“, изјави таа.

Од Netflix засега нема официјален коментар за тужбата, но случајот веќе предизвикува огромен интерес во американските медиуми и повторно ја отвора дебатата за границата меѓу документарното новинарство, уредувачката слобода и заштитата на угледот на јавните личности.