Кои европски земји остануваат без вода?

Иако Европската Унија како целина користи само 5,8 проценти од своите расположиви слатководни ресурси, што на прв поглед може да изгледа смирувачко, овој просек крие драстични и загрижувачки разлики меѓу поединечните земји-членки. Додека Европа преживува уште едно жешко лето, анализата на податоците покажува дека некои земји се соочуваат со критичен недостиг на вода, објавува Euronews.

Зона на предупредување
Реалноста е дека разликите меѓу земјите се зачудувачки. Најдобар пример е Кипар, кој практично е во постојана вонредна состојба. Според податоците од Евростат и Европската агенција за животна средина (EEA), островската нација користи дури 72 проценти од своите слатководни ресурси, а во лето оваа бројка се искачува на алармантни 92 проценти.

За споредба, се смета дека една земја влегува во зоната на предупредување кога потрошувачката достигнува 20 проценти од нејзината достапна вода. Порано оваа година, властите ги повикаа жителите да ја намалат дневната потрошувачка на вода за 10 проценти, што е еквивалентно на околу две минути користење на вода.

Дополнителен притисок е и брзиот раст на населението на островот. Владата работи брзо на инсталирање постројки за десалинизација за да се обезбеди вода за пиење, особено пред туристичката сезона, а справувањето со оваа криза е еден од приоритетите на кипарското претседателство со Советот на Европската Унија.

Прекумерна потрошувачка
По Кипар, Малта е следна на листата на земји во ризик, со годишна стапка на користење на вода од 33 проценти, која се зголемува на 67 проценти во лето. Слично сценарио се забележува и во другите медитерански земји: Грција (37%), Романија (34%), Португалија (31%), Италија (27%) и Шпанија (26,5%) се длабоко во зоната на предупредување во текот на летниот период поради прекумерна потрошувачка на вода.

Европската агенција за животна средина предвидува дека климатските промени и сушите веројатно ќе ја зголемат „фреквенцијата, интензитетот и влијанието“ на недостигот на вода барем до 2030 година.

Друг извештај на агенцијата, „Прегреани и неподготвени“, покажа дека околу еден од десет граѓани на ЕУ се соочуваат со проблеми со пристап до доволни количини безбедна и чиста вода.

Застарена инфраструктура
Овој проблем е најакутен во Кипар (36,5%) и Грција (31,5%). Интересно е што некои од земјите каде што е отежнат пристапот до вода – вклучувајќи ги Бугарија, Унгарија, Хрватска и Ирска – немаат особено високи стапки на експлоатација на свежа вода.

Ова сугерира дека проблемот со пристапот до вода во овие случаи не е толку поврзан со недостигот колку со застарената инфраструктура и недостатоците во системите за снабдување.

Од друга страна, и покрај проблемите со потрошувачката со слатководни ресурси, Франција, Португалија и Шпанија се чини дека се подобри во управувањето со дистрибуцијата на чиста и безбедна вода. Во овие земји, уделот на населението што се соочува со проблеми со снабдувањето е далеку под просекот на ЕУ од 9 проценти.

Текстот Кои европски земји остануваат без вода? е превземен од МАКФАКС.