Бразил со драматичен пресврт ја елиминира Јапонија – Мартинели херој во судиското продолжение

Фудбалската репрезентација на Бразил обезбеди пласман во четвртфиналето на Светското првенство 2026, откако со голем пресврт ја совлада Јапонија со 2-1 во осминафиналниот дуел. „Кариоките“ губеа по првото полувреме, но во вторите 45 минути успеаја да го свртат резултатот, а победничкиот гол го постигнаа во судиското продолжение.

Јапонија прва стигна до водство во 29. минута. Каишу Сано ја искористи грешката на Данило, пресече едно додавање и со прецизен удар од околу дваесет метри го совлада Алисон за 1-0.

Иако избраниците на Карло Анчелоти имаа целосна контрола врз топката во првото полувреме, тешко создаваа вистински шанси. Најопасни беа ударите на Бруно Гимараеш од далечина и обидот на Матеус Куња, кој одлично го одбрани јапонскиот голман Сузуки.

Анчелоти реагираше веднаш по паузата со внесувањето на младиот Ендрик, по што Бразил заигра многу поофанзивно. Притисокот донесе резултат во 56. минута, кога по центаршут од десната страна Каземиро остана сам на втората статива и со удар со глава израмни на 1-1.

Само неколку минути подоцна Винисиус Жуниор беше блиску до комплетен пресврт, но неговиот удар заврши во стативата.

Во продолжението Јапонија успешно се бранеше и изгледаше дека натпреварот ќе замине во продолженија. Сепак, Бразил не се предаде.

Во шестата минута од судиското продолжение, „селесао“ украде топка високо на противничката половина, по што следуваше брза акција. Бруно Гимараеш мајсторски го проигра Габриел Мартинели, кој остана смирен и со прецизен удар ја затресе мрежата за конечни 2-1 и огромно славје на петкратниот светски шампион.

Со оваа победа Бразил обезбеди место во четвртфиналето на Светското првенство, каде ќе се сретне со победникот од дуелот меѓу Норвешка и Брегот на Слоновата Коска.