Канада официјално влегува на Евровизија: Од 2027 година ќе биде нов учесник на најголемото музичко шоу

Канада официјално ќе стане нова учесничка на Изборот за песна на Евровизија од 2027 година, со што ќе биде првата нова земја што му се приклучува на натпреварот по Австралија, која дебитираше во 2015 година.

Веста ја соопштија Европската радиодифузна унија (EBU) и канадскиот јавен сервис CBC, кои потврдија дека Канада ќе испрати свој претставник на Евровизија 2027, што ќе се одржи во Бугарија во мај. Објавата беше направена симболично на Денот на Канада, националниот празник на земјата.

Членството во EBU го отвори патот

Иако Евровизија традиционално се поврзува со Европа, учеството не е ограничено само на европските држави. Право на настап имаат сите членки на Европската радиодифузна унија.

Канада неодамна стана членка на EBU, додека Австралија, која настапува веќе повеќе од една деценија, има статус на придружна членка.

Претседателката на CBC, Мари-Филип Бушар, изјави дека учеството ќе им овозможи на канадските музичари да се претстават на една од најпрестижните музички сцени во светот.

„Ова ќе биде можност канадскиот талент да биде претставен на една од најпознатите музички сцени во светот“, изјави Бушар.

Наскоро ќе биде познат начинот на избор

Од CBC најавија дека подоцна оваа година ќе ги објават правилата според кои ќе биде избран канадскиот претставник.

Некои земји, како Шведска и Италија, организираат големи национални телевизиски избори, додека други, како Обединетото Кралство, својот претставник го избираат директно преку националниот јавен сервис.

Директорот на Евровизија, Мартин Грин, оцени дека приклучувањето на Канада е доказ дека натпреварот продолжува да се развива на глобално ниво.

„Иако Евровизија е родена во Европа, таа продолжува да го отвора својот простор за целиот свет“, изјави Грин.

Канаѓани и претходно победувале на Евровизија

Иако Канада досега никогаш немала свое официјално учество, повеќе канадски пејачи настапувале под знамињата на други држави.

Најпознат пример е Селин Дион, која во 1988 година победи на Евровизија претставувајќи ја Швајцарија со песната „Ne Partez Pas Sans Moi“.

Под знамето на Франција настапуваа и Наташа Сен-Пјер во 2001 година и Ла Зара во 2023 година.

Евровизија продолжува да се шири

Годинешното, 70. издание на Евровизија, на кое победи бугарската пејачка Дара, собра 35 земји учеснички, а финалето го следеле околу 130 милиони гледачи ширум светот.

Следното издание ќе се одржи во Софија, како домаќин по бугарската победа.

Во последните години натпреварот се соочи и со политички контроверзии. Пет земји – Шпанија, Холандија, Ирска, Исланд и Словенија – го бојкотираа годинашното издание поради одлуката Израел да остане дел од натпреварот и покрај војната во Газа. Засега не е познато дали овие земји ќе се вратат на следните изданија.

Покрај проширувањето со Канада, организаторите најавија и нов проект – „Евровизија Азија“, чие прво издание треба да се одржи во Бангкок во ноември, што претставува уште еден чекор кон глобализација на најпознатиот музички натпревар во светот.