Род Стјуарт ги воодушеви фановите по здравствените проблеми: На 81 година одржа концерт од 90 минути и докажа дека е во одлична форма

Британската рок легенда Род Стјуарт повторно ги воодушеви своите обожаватели, само неколку недели по серијата здравствени проблеми и откажани концерти. Осумдесет и едногодишниот музичар настапи на хуманитарен настан во Саутемптон, во Хемптонс, каде со енергичен настап покажа дека повторно е во одлична форма.

Стјуарт беше главната ѕвезда на добротворната вечер организирана во луксузна вила, во поддршка на фондацијата TeachRock, основана од членот на E Street Band, Стивен Ван Зандт. Според присутните, музичарот одржал целосен концерт во траење од околу час и половина.

Во текот на настапот ги изведе своите најголеми хитови, меѓу кои „The First Cut Is the Deepest“, „Have I Told You Lately“ и „Forever Young“, а цело време танцувал на сцената и бил полн со енергија.

„Сите зборуваа колку неверојатно изгледаше. Танцуваше низ целата сцена на 81 година. Во подобра форма е од многу мажи кои имаат двојно помалку години“, изјавил еден од присутните.

Друг гостин додал дека Стјуарт звучел одлично и дека настапот бил вистинско уживање.

И самиот Род Стјуарт се огласи по концертот, истакнувајќи колку му значи мисијата на TeachRock.

„Музиката ми го покажа патот кога бев млад и никогаш не сум го заборавил тоа. Она што Стиви го создаде со TeachRock е вистинска приказна – враќање на музиката во училиштата и инспирација за новите генерации. Да ја делам сцената со него во Саутемптон за ваква цел е токму она што е најважно“, изјави пејачот.

За време на вечерта, Стјуарт и Ван Зандт заеднички ги изведоа песните „We’re Having a Party“ и „Stay With Me“.

Настапот следува по период исполнет со здравствени предизвици за музичарот. Во јуни тој беше принуден да го откаже концертот во Сан Диего по препорака на лекарите, откако му беше дијагностицирана акутна инфекција на горните дишни патишта, која предизвикала ларингитис.

Само еден ден подоцна беше фотографиран како присуствува на натпревар од Светското првенство, што предизвика незадоволство кај дел од фановите кои очекувале целосен одмор.

Поради потребата од одмор на гласните жици, Стјуарт ги одложи и концертите во Red Rocks Park and Amphitheatre во Колорадо, а на 22 јуни за време на настап во Јута накратко го прекина концертот и употреби боца со кислород. Според извештаите, високата надморска височина можела да влијае на неговата состојба.

Претходно, во мај, тој откажа и два концерта во Лас Вегас.

Сепак, најновиот настап покажа дека легендарниот музичар успешно се враќа на сцената.

Според извори блиски до организаторите, Род Стјуарт настапил без хонорар, како поддршка на хуманитарната организација која се залага музичкото образование повторно да биде дел од училиштата.

Добротворната вечер собрала околу 1,7 милиони долари за TeachRock, организација чии основачи и поддржувачи се големи имиња како Боно, Џексон Браун, Мартин Скорсезе и Брус Спрингстин.

Во рамките на аукцијата, вечера со Стивен Ван Зандт и тројца актери од серијата „The Sopranos“ беше продадена на двајца донатори за по 80.000 долари, односно вкупно 160.000 долари.

На настанот присуствуваа бројни познати личности, меѓу кои модната дизајнерка Џорџина Чепман, креаторката на Њујоршката модна недела Ферн Малис, Крис и Кристина Куомо, Рамона Сингер и Стефано Тонки.

По успешното враќање на сцената, Род Стјуарт продолжува со концертните активности, а неговиот следен настап е закажан на Jones Beach.