Вечерва на „Охридско лето“: Џез со „Kiiōtō“ и „Уна“ со Никола Ристановски

Фестивалот „Охридско лето“ вечерва продолжува со две атрактивни содржини од својата програма – музичка џез-вечер со британскиот состав „Kiiōtō“ и театарската претстава „Уна“, работена според мотиви од култниот роман на Момо Капор, во продукција на Театарот „Ѕвездара“ од Белград.

Љубителите на музиката ќе имаат можност да го проследат настапот на „Kiiōtō“, музички проект зад кој стојат наградуваниот пијанист и композитор Рохан Хит и вокалистката Лу Роудс, позната и како членка на британскиот бенд „Лемб“.

На сцената со нив ќе настапи и контрабасистот Џон Торн.

Музиката на „Kiiōtō“ произлегува од заедничките музички искуства на двајцата автори, а во нивното творештво значајно место имаат поезијата и темите поврзани со човековиот живот.

Роудс и Хит повеќе од три децении се присутни на музичката сцена и зад себе имаат настапи на некои од најпознатите светски фестивали, меѓу кои „Коачела“, „Гластонбери“ и Џез-фестивалот во Монтро.

Лу Роудс е позната како вокалистка на „Лемб“, а во својата соло-кариера била номинирана и за престижната награда „Меркјури“.

Рохан Хит, пак, бил фронтмен на „Урбан Куки Колектив“, група препознатлива по големиот хит „The Key, The Secret“.

Во рамките на драмската програма вечерва ќе биде изведена претставата „Уна“, работена според мотиви од романот на Момо Капор.

Претставата е во режија на Дејан Пројковски, а продукцијата е на Театарот „Ѕвездара“ од Белград.

Текстот за сценската адаптација го напиша Стеван Копривица. Тој се темели на романот на Капор, но во претставата добива и нови значења и конотации поврзани со времето во кое живееме.

„Уна“ отвора повеќе теми – сеќавањето, љубовта, минливоста и човечките односи, но и влијанието што минатото го има врз сегашноста.

Како што истакнува режисерот Дејан Пројковски, претставата се занимава и со прашањето како да се зачуваат автентичноста и искреноста во време обележано со технологија, социјални мрежи и сè поповршна комуникација меѓу луѓето.

Во актерската екипа е Никола Ристановски, кој го толкува ликот на Мишел Бабиќ, професор по медиумска социологија.

Магдалена Мијатовиќ ја игра Уна Војводиќ, студентка по медиумска социологија, додека Сена Ѓоровиќ настапува во улогата на Олга Бабиќ.

Марко Гверо го толкува ликот на проректорот Дукиќ.

Сценографијата за претставата е дело на Валентин Светозарев, додека костимите ги изработи Ивана Ристиќ.

Двете фестивалски содржини започнуваат во 21 часот.

Џез-составот „Kiiōtō“ ќе настапи на сцената „Долни Сарај“, додека претставата „Уна“ ќе биде изведена на сцената на Центарот за култура „Григор Прличев“.

Со музика од британската сцена и театарска постановка со силна актерска екипа и современо читање на делото на Момо Капор, „Охридско лето“ вечерва нуди избор и за љубителите на џезот и за театарската публика.