Трамп ги игнорираше сите предупредувања од високи функционери пред да одлучи да го нападне Иран, објави „Волстрит журнал“

Американскиот претседател Доналд Трамп започна офанзива против Иран во февруари и покрај повторените предупредувања од неговиот шеф на разузнавањето, потпретседателот и високите воени советници дека конфликтот може да предизвика глобална енергетска криза и да доведе до поцврсто иранско раководство, објави „Волстрит журнал“.

Трамп ги игнорирал предупредувањата
Според луѓе запознаени со состаноците одржани пред војната, тогашната директорка на Националното разузнавање Тулси Габард го предупредила Трамп дека атентатот врз врховниот лидер на Иран може да доведе до уште поцврста влада во Техеран и затворање на Ормускиот теснец, клучен превозен пат низ кој минува една петтина од светската трговија со нафта и гас.

Потпретседателот на САД, Џеј Ди Венс, се залагал за „попретпазлив“ пристап што им дава приоритет на преговорите, тврдејќи дека дипломатскиот договор би бил поевтин од војната со „непријатни последици“.

Додека високи воени функционери, вклучувајќи го министерот за одбрана Пит Хегсет и претседателот на Здружениот генералштаб, генерал Ден Кејн, го информирале Трамп за можностите за „решителен“ удар, други функционери изразиле загриженост за недостигот на муниција и ризикот од „преоптоварени сили“.

Трамп: Војската може да реши сè
Трамп наводно ги отфрлил тие загрижености, сугерирајќи дека војската може да го „реши секој проблем“ како што ќе се појави. Во извештајот се вели дека Трамп првично бил задоволен од почетокот на војната и се фалел во Мар-а-Лаго кога бил информиран за атентатот врз тогашниот врховен лидер Али Хамнеи.

Но, како што цените на горивата се зголемија, а војната застана, регионалните лидери од Саудиска Арабија и Катар извршија притисок врз Белата куќа за дипломатско решение. Внатрешните анкети покажаа дека речиси 80 проценти од Американците поддржуваат договор за завршување на војната, што го натера Трамп да повика на привремен прекин на огнот во јуни.

Некои републиканци го предупредија Трамп за потенцијалното влијание на продолжената војна врз неговите шанси на меѓуизборите во ноември.

Рокот од 60 дена за нуклеарните преговори истече на 17 август без конечно решение.

Администрацијата оттогаш се врати на Операцијата Економски егзил, кампања за економско војување насочена кон ослабување на иранската влада преку трајна поморска блокада и санкции.

Текстот Трамп ги игнорираше сите предупредувања од високи функционери пред да одлучи да го нападне Иран, објави „Волстрит журнал“ е превземен од МАКФАКС.