Иран ги отфрла новите санкции на САД: „Америка нема да постигне ништо“

Иранскиот претседател Масуд Пезешкијан денес изјави дека САД нема да постигнат ништо со нова рунда економски санкции. Неговата изјава е одговор на Техеран на најавите на Вашингтон за економско задушување на Иран, пренесува „Еуроњуз“.

„Благодарение на мерките подготвени од економските сектори на владата, Америка нема да постигне ништо со економски притисок во оваа фаза, исто како што не успеа во војната“, рече Пезешкијан, како што објави новинската агенција ИСНА.

„Нашиот принцип е да ги решаваме проблемите преку разбирање и преговори, но во исто време остануваме цврсти пред економскиот притисок, како што бевме и досега“, додаде тој.

Иран го отфрла влијанието на новите мерки
Министерот за финансии на САД, Скот Бесент, завчера ги претстави плановите за „економско задушување“ на Иран и предупреди на тешки последици за земјите што нема да се приклучат на кампањата. Иранските лидери го отфрлија влијанието на новите мерки. Тие истакнуваат дека земјата веќе се соочила со децении разорни санкции, кои беа воведени кратко по Исламската револуција во 1979 година.

Преговорите меѓу Иран и САД се во застој поради спор околу контролата врз стратешки важниот Ормуски теснец. Сообраќајот низ тој клучен воден пат, кој носи околу една петтина од светскиот извоз на нафта и течен природен гас, останува во голема мера парализиран, предизвикувајќи нарушувања на глобалните енергетски пазари.

Иран го контролира Ормускиот теснец од почетокот на војната на 28 февруари и се обидува да наметне такси за бродовите што минуваат низ теснецот. Вашингтон, од друга страна, сака враќање на предвоениот систем на слободна пловидба, а американскиот претседател Доналд Трамп тврди дека Вашингтон има „целосна контрола“ врз таа рута.

Договор за забрана на премин на воени бродови
Техеран вчера објави дека, според договорот што моментално го преговара со Оман, нема да дозволи воени бродови да минуваат низ Ормускиот теснец. Ова го изјави иранскиот заменик-министер за надворешни работи, Казем Гарибабади, на државната телевизија.

Шефовите на дипломатиите на двете земји се состанаа за да разговараат за управувањето со сообраќајот на комерцијалниот бродски сообраќај. Според Гарибабади, тие го постигнале договорот вчера. „Доколку овој договор стане обврзувачки, на ниту еден воен брод нема да му биде дозволен премин низ Ормускиот теснец“, рече тој.

Гарибабади не даде дополнителни детали за воениот сообраќај, но ја опиша предложената комерцијална рута. Тој објасни дека влезниот сообраќај во Персискиот Залив од Оманскиот Залив ќе помине целосно низ иранските води, додека излезната рута ќе оди делумно низ иранските и делумно низ територијалните води на Оман.

Администрацијата на Трамп изјави дека се спротивставува на делови од договорот што се подготвува, особено заедничкото иранско и оманско управување со излезната рута од теснецот, што е клучно за светската трговија.

Текстот Иран ги отфрла новите санкции на САД: „Америка нема да постигне ништо“ е превземен од МАКФАКС.