Археолозите отворија гробница стара 600 години: Пронајдени останки од 38 луѓе, злато и оружје

Археолози во Перу открија речиси недопрена гробница стара околу 600 години, која ѝ припаѓала на високопозиционирана личност од прединканската култура Чиму. Во погребниот комплекс се пронајдени човечки останки, оружје и повеќе вредни предмети од злато и бакар.

Откритието е направено во комплексот Утж Ан, во рамките на древниот град Чан Чан, некогашната престолнина на Чиму во близина на денешниот град Трухиљо. Перуанското Министерство за култура го оцени наодот како историски, бидејќи погребната комора останала запечатена и заштитена од ограбувачи речиси шест века.

Мавзолејот е изграден како погребна платформа со страни долги речиси 17 метри и височина од околу пет метри. Скалите се спуштаат приближно 2,4 метри до внатрешноста, во која се наоѓаат една централна и две странични простории.

Во централната комора биле откриени останките на една личност за која се претпоставува дека припаѓала на општествената елита. На черепот бил забележан црвен пигмент, а дополнителните анализи треба да покажат дали станува збор за цинабар – скапоцен минерал што во древните андски култури често бил поврзуван со погребувањето на лица со висок статус.

Околу централниот погреб археолозите пронашле останки од уште 37 лица. Едната странична просторија била празна, додека во другата имало вредни предмети и останки од околу 20 луѓе. Меѓу пронајдените артефакти има метално оружје, бакарни и златни предмети и други украсени погребни прилози. Според извештајот на „Ел Паис“, распоредот на погребите и богатството на предметите треба да помогнат во утврдувањето на односите и хиерархијата меѓу погребаните.

Главниот археолог на проектот, Хорхе Менесес, нагласи дека ова е првпат перуански археолози да откријат речиси недопрена погребна платформа наменета за припадник на елитата, чија комора останала затворена околу 600 години.

Првите траги што воделе до гробницата биле забележани пред околу четири години. Археолозите првично откриле мала и незабележлива вдлабнатина, но дополнителното истражување покажало дека зад неа се крие влез затрупан со камења. Се претпоставува дека токму камениот насип ја заштитил гробницата од ограбувачите.

Посебно внимание привлекува фактот што во централната просторија била погребана само една личност, што претставува отстапување од досега познатите погребни обичаи на културата Чиму. На дел од скелетите им недостигаат коски, а истражувачите не ја исклучуваат можноста тие да биле преместувани при обреди на повторно погребување. Таквите ритуали биле присутни кај андските заедници како начин за одржување на симболичната врска со починатите. Откритието и распоредот на коморите ги пренесува и „Гизмодо“.

Културата Чиму се развивала на северниот брег на денешно Перу меѓу 900 и 1470 година, кога нејзината територија била освоена од Инките. Нејзините припадници создале сложен политички, економски и религиозен систем, како и препознатлива архитектура од непечена тула.

Чан Чан, кој бил политички и административен центар на Чиму, денес е локалитет на светското наследство на УНЕСКО. И покрај долгогодишните истражувања, археолозите досега ископале не повеќе од седум проценти од неговата вкупна заштитена површина.

Следуваат лабораториски и генетски анализи на човечките останки, со кои истражувачите ќе се обидат да утврдат дали погребаните лица биле во роднинска врска, каков статус имале и на кој начин бил организиран погребниот обред. Ќе се анализираат и архитектурата на мавзолејот, црвениот пигмент и пронајдените предмети.

Археолозите веруваат дека откритието може да понуди досега невиден увид во животот, хиерархијата и погребните традиции на елитата на Чиму. Бидејќи најголемиот дел од Чан Чан сè уште не е истражен, научниците очекуваат древниот град да открие уште многу тајни.