Тоа беше мој личен став, вели Гаши за реакцијата за пресудата за водачите на ОВК

Претседателот на Собранието Африм Гаши пред медиумите ја објасни реакцијата за пресудата на Хашкиот суд за четворицата водачи на ОВК- Хашим Тачи, Јакуп Красниќи, Кадри Весели и Реџеп Селими. Собранискиот спикер кажа дека тој својот став го изнел на својот личен фејсбук-профил и во него никаде не се повикал на Собранието.

Според Гаши, иако е прв човек на парламентот, тој има право на своја приватност и став и како граѓанин и како политичар за одреден настан, ситуација или прашање, независно од функцијата на која во моментов се наоѓа.

„Очекувам и вие новинарите, и граѓаните да сфатат дека личноста Африм Гаши не може да биде 24 часа, и од политички аспект, само претседател на Собранието. И затоа свесен дека не го кажувам тоа од позиција на претседател на Собранието, тоа беше мој личен став од моето политичко минато и затоа беше јасно дека никаде не се повикав на Собранието или на институцијата. Затоа би сакал и вие и граѓаните да разберат дека тоа е мој личен став и не треба да се меша со функцијата која ја извршувам“, изјави Гаши

Откако Специјализираниот совет ги изрече пресудите за поранешните водачи на ОВК, Гаши во објава на својот фејсбук-профил, напиша дека тие припаѓаат на славно поглавје во историјата на Косово. Посочувајќи оти станува збор за првостепена пресуда на која е дозволена жалба, претседателот на Собранието наведе и дека тоа е „денот кога сите треба да застанат заедно, и со достоинство и смиреност да докажат дека нивните умови и срца се блиску до ослободителите на Косово и нивните семејства“.

Текстот Тоа беше мој личен став, вели Гаши за реакцијата за пресудата за водачите на ОВК е превземен од МАКФАКС.