ФОТО | Новата госпоѓа Трамп привлекува сè поголемо внимание: Од Палм Бич до афера што стигна во Конгресот

До неодамна Бетина Андерсон беше позната главно во високите општествени кругови на Палм Бич. Денес го носи презимето Трамп, патува со американскиот претседател и неговото семејство, а само неколку месеци по венчавката со Доналд Трамп Помладиот се најде во центарот на контроверзија што стигна и до Конгресот.

Триесет и деветгодишната Бетина неодамна го придружуваше сопругот за време на посетата на американскиот претседател Доналд Трамп на Ирска.

При приемот во официјалната резиденција на ирската претседателка Кетрин Коноли во Даблин, таа стоеше покрај сопругот и дел од неговите деца. Ирските медиуми го потврдија присуството на Бетина и Доналд Трамп Помладиот меѓу членовите на семејството што допатуваа со претседателот.

По посетата, Бетина на Инстаграм објави и неколку помалку формални фотографии, меѓу кои селфи со претседателот Трамп и неговата внука Клои, како и кадар од авионот на кој седи наспроти свекорот.

Од високото друштво на Палм Бич до семејството Трамп

Пред врската со Доналд Трамп Помладиот, Бетина беше добро познато лице на општествената сцена во Палм Бич.

Списанието „Avenue“ своевремено ја прогласи за локална „it“ девојка, а таа никогаш не криела дека е горда на широкиот круг познанства и на способноста да поврзува луѓе, како приватно, така и деловно.

Двојката ја официјализираше врската во мај годинава. Најпрво склучиле граѓански брак во Флорида, а потоа организирале интимна церемонија и повеќедневна прослава на приватни острови на Бахамите.

Бетина за свадбениот викенд избрала две креации од лондонскиот бренд „Safiyaa“. Особено впечатлива била вечерната комбинација од двојна свилена органза, украсена со кристали и рачно изработен метален и свилен вез, за кој наводно биле потребни околу 150 часа работа.

Гостите пристигнувале со хеликоптери и хидроавиони, а петкатната торта била донесена од Флорида. Прославата вклучувала диџеј, традиционална карипска музика и огномет над морето, додека младенците го одиграле првиот танц на песната „Can’t Help Falling in Love“ од Елвис Присли.

Подготовки до најситниот детаљ

Колку внимание било посветено на изгледот пред венчавката откри естетскиот центар „Pure Skin Palm Beach“, кој Бетина, според нивните наводи, го посетува со години.

Центарот објавил долг список третмани што ги направила во месеците пред свадбата, меѓу кои „Ultherapy“, „Sculptra“, „Renuva“, „MOXI“ и „Tixel“, како и третмани за лицето, косата и рацете.

Посебно внимание наводно им било посветено на нејзините раце, за да изгледаат што подобро на фотографиите со венчалниот прстен.

Подготовки имал и младоженецот. Според истиот естетски центар, Доналд Трамп Помладиот направил неинвазивен третман со ултразвук за затегнување на кожата и поизразена линија на вилицата.

Но, неколку месеци подоцна, прашањето кој платил дел од раскошниот свадбен викенд стана многу посериозна тема.

Прославата прерасна во политичка контроверзија

Истражувачкиот портал „ProPublica“ објави дека стотици илјади долари од трошоците поврзани со прославата ги покрил Умар Кремлев, руски бизнисмен и претседател на Меѓународната боксерска асоцијација.

Според документите и изворите на кои се повикува медиумот, Кремлев платил дел од трошоците за приватен остров, сместувањето и огнометот. „ProPublica“ го поврзува со руските владејачки кругови и со претседателот Владимир Путин, кој му го доделил Орденот на пријателството.

Бетина и Доналд Трамп Помладиот не негираа дека Кремлев финансирал дел од прославата, но нагласија дека тој не ја платил самата венчална церемонија.

Според нивното објаснување, рускиот бизнисмен бил нивен пријател кој им подарил две вечери прослава по малата семејна церемонија.

„Нашиот драг пријател Умар многу великодушно организираше две неверојатни вечери за нас“, соопштија младенците, оценувајќи дека неговата помош била извонредно дарежлив свадбен подарок, а не политички мотивиран потег.

Трамп најави дека парите ќе бидат вратени

Американскиот претседател изјави дека не го познава Кремлев и дека неговиот син му кажал дека ќе ги врати парите потрошени за прославите.

„Ми рече: ‘Не, тато, ќе ги вратам парите’“, изјави Трамп пред новинарите, истовремено бранејќи го својот син и оценувајќи дека пријателите често си организираат вакви прослави.

Случајот потоа стигна и до Конгресот. Демократски членови започнаа да бараат документација за односите меѓу Трамп Помладиот и Кремлев, додека републиканскиот сенатор Џон Кертис побара дополнителна проверка на нивните деловни врски и на можноста членовите на претседателските семејства да стекнуваат лична корист поради својата политичка близина.

Од случајот јавно се дистанцира и кабинетот на првата дама Меланија Трамп. Нејзиниот портпарол соопшти дека таа нема и никогаш немала однос со Кремлев и дека не присуствувала ниту на церемонијата ниту на подоцнежните прослави на Бахамите.

За Бетина, која до неодамна беше позната главно како припадничка на високото друштво во Палм Бич, последните месеци донесоа драматична промена.

Од приватна венчавка и влез во едно од најпознатите политички семејства во светот, таа за кратко време стигна до официјални претседателски патувања, медиумско внимание и контроверзија што ги отвори прашањата за странското влијание и финансирањето на семејството на американскиот претседател.