Таравари: Мицкоски предупредува дека една искра може да го запали регионот, стабилноста треба да започне одвнатре

Ако премиерот Христијан Мицкоски е свесен дека неодговорната реторика и само една искра можат да предизвикаат сериозни тензии на Балканот, тогаш оваа одговорност треба пред сè да ја покаже внатре во Северна Македонија, вели Арбен Таравари од Алијанса за Албанците.

Албанците, подвлекува тој, како втора по големина заедница во земјата, заслужуваат целосна институционална почит, правична застапеност и еднаков третман.

„Стабилноста не се гради само со изјави на меѓународни средби, туку со политики што ја зајакнуваат довербата меѓу граѓаните и го зачувуваат мултиетничкиот карактер на државата.

Истата одговорност е потребна и во односите со соседите, вклучително и со Бугарија, како и во однос на евроинтегративниот процес“.

Според Таравари, отворените прашања треба да се решаваат преку дијалог, почит и политичка одговорност, додека патот кон Европската Унија не треба да се претвори во постојан извор на тензии и блокади.

„Ако навистина веруваме дека една искра може да го запали регионот, тогаш должност на Владата е да не создава искри внатре во земјата.

На Северна Македонија ѝ се потребни повеќе дијалог, повеќе еднаквост и јасна европска ориентација“.

Текстот Таравари: Мицкоски предупредува дека една искра може да го запали регионот, стабилноста треба да започне одвнатре е превземен од МАКФАКС.