Том Круз ја пофали Кејт Мидлтон: „Вилијам направил паметен избор“

Том Круз со насмевка проговори за средбата со принцот Вилијам и принцезата Кејт на лондонската премиера на неговиот нов филм „Digger“. Неколку дена подоцна, на премиерата во Лос Анџелес, актерот изјави дека кралската двојка оставила силен впечаток врз него, а особено ја пофали Кејт.

Во разговор за емисијата „Extra“, Круз ја опиша принцезата од Велс како интелигентна, забавна и со одлична смисла за хумор. Се осврна и на нејзиниот изглед на премиерата, нарекувајќи го впечатлив фустанот во виолетова боја што го носеше таа.

„Вилијам добро избрал. Браво, паметен избор“, рече Круз на шега, алудирајќи на бракот на принцот и принцезата. Актерот додаде дека и двајцата се харизматични и елегантни и дека му било задоволство да ги види на проекцијата на филмот.

Круз зборуваше и за почитта што ја има кон нивната јавна работа. Според него, Вилијам и Кејт се посветени на својата земја, а во личниот контакт биле срдечни и духовити.

Тројцата се сретнаа на светската премиера на „Digger“ во Лондон на 22 септември, каде што разговараа и се фотографираа. Кејт за настанот избра долг виолетов фустан од Џени Пакам, кој Круз го издвои меѓу своите впечатоци од вечерта.

Принцот Вилијам и Кејт стапија во брак во април 2011 година во Вестминстерската опатија во Лондон. Тие имаат три деца – принцот Џорџ, принцезата Шарлот и принцот Луис.