Фил Колинс и Пол Макартни се помириле по 24 години: „Жал ми е што го кажав тоа“

Фил Колинс откри дека го расчистил долгогодишното недоразбирање со Пол Макартни. Во интервју за „Piers Morgan Uncensored“, музичарот раскажа дека неодамна разговарале по телефон и се помириле по спор што започнал во 2002 година.

Причината била средба за време на пробите за концертот по повод јубилејот на кралицата Елизабета Втора во Бакингемската палата. Колинс му однел на Макартни ретко прво издание на книга за „Битлси“ од Хантер Дејвис и го замолил да му го потпише. Според сеќавањето на Колинс, Макартни потоа ѝ рекол на тогашната сопруга Хедер Милс дека „нашиот мал Фил“ е голем обожавател на групата. Колинс го доживеал коментарот како потценувачки.

Години подоцна, додека ги промовирал мемоарите „Not Dead Yet“ во 2016 година, Колинс јавно проговорил за случката. Макартни му испратил електронска порака во која изразил разочарување од неговите зборови, но недоразбирањето тогаш не било разрешено.

Контактот бил обновен кога Макартни слушнал дека Колинс организира добротворна аукција за „The King’s Trust“ и бара музичари што би донирале предмети. Во телефонскиот разговор Макартни самиот ја отворил темата за нивниот однос.

Колинс му кажал дека жали што јавно го изнел својот впечаток од средбата. Денес признава и дека можеби му придал поголемо значење на коментарот отколку што Макартни имал намера. „Се помиривме“, рече Колинс, додавајќи дека му е драго што конечно разговарале за случката.