Премиерата на „Фрида“ е распродадена: Драмски театар закажа претпремиера на 18 октомври

Поради големиот интерес за новата претстава „Фрида“, Драмски театар Скопје отвори дополнителна вечер за публиката. Претпремиерата ќе се одржи на 18 октомври во 20 часот, додека премиерата, закажана за 19 октомври, веќе е распродадена.

Претставата ја носи на сцена приказната за мексиканската сликарка Фрида Кало, зад познатите автопортрети, цветната круна и живописните бои. Во средиштето е жената која се соочувала со физичка болка, загуби и сложени односи, а своите искуства ги претворала во уметност.

Фрида Кало ја игра Драгана Левенска, а во улогата на Диего Ривера е Сашо Тасевски. Во актерската екипа се и Марија Бреслиска и Марија Талеска.

Приказната ја следи Фрида по несреќата што трајно го променила нејзиното тело. Во долгите периоди на закрепнување, креветот станува место за сликање, а огледалото ѝ овозможува да се набљудува и да создава автопортрети. На платното ги пренесува своите рани, желби и загуби, барајќи сопствен начин да се спротивстави на ограничувањата што ѝ ги наметнува животот.

Значаен дел од претставата е односот со Диего Ривера. Нивната врска е прикажана низ љубовта и творечката блискост, но и низ судирите, неверствата, разделбите и повторните зближувања. Нивните животи се движат меѓу Мексико, Детроит и Париз, во време во кое уметноста се преплетува со револуцијата и политичките превирања.

Претставата го истражува и стремежот на Фрида кон слобода: нејзината потреба да сака, да создава и да го изразува она што го чувствува, дури и кога тоа значи да ги покаже сопствените слабости. Мексиканските ритми и културниот свет во кој живеела се дел од сценската приказна.

Авторка на текстот е Драгана Левенска, а режијата е на Тамара Стојаноска. Сценографијата ја потпишува Филип Коруновски, костимографијата Иван Ивановиќ, а музиката Марјан Неќак.

Со претпремиерата на 18 октомври, публиката добива уште една можност да ја погледне „Фрида“ пред распродадената премиера.