ФОТО | Хари Стајлс во расправија на улица во Њујорк: Маж го следел барајќи автограм

Хари Стајлс беше снимен во вербална расправија со маж кој барал автограм на улица во Њујорк. Според „Page Six“, кој се повикува на видеоснимки објавени од TMZ, настанот се случил во средата, на 21 октомври.

На првата снимка, според описот на медиумот, мажот оди зад пејачот и повеќепати се обидува да му го привлече вниманието. Стајлс, облечен во дуксер и бејзбол-капа, со жичени слушалки во ушите, продолжува да се движи без да одговори.

Ситуацијата потоа станува понапната. На друга снимка двајцата се гледаат како разменуваат зборови со повишен тон и покажуваат со прст еден кон друг.

Не е јасно што точно си кажуваат, ниту што непосредно ја предизвикало расправијата.

Во еден момент, трет маж застанува меѓу нив, навидум обидувајќи се да ја смири ситуацијата. Лицето што бара автограм во рацете држи примерок од албумот „Fine Line“.

Кога Стајлс се обидува да се оддалечи, мажот продолжува да оди покрај него, по што снимката завршува. „Page Six“ наведува дека побарал коментар од претставниците на пејачот.

Стајлс престојува во Њујорк поради серијата концерти

Пејачот периодов настапува во „Медисон сквер гарден“, каде што има серија од 30 концерти во рамките на турнејата „Together, Together“.

Настапите започнаа на 26 август и се предвидени до 31 октомври. Според организаторот, ова се неговите единствени концертни датуми во САД за 2026 година.