Себастијан Курц предупредува на големи промени во Европа

За десет години ќе живееме во сосема поинаков свет, рече Себастијан Курц, посочувајќи ги проблемите со миграцијата во Франција, политичката криза во Германија и слабеењето на традиционалните политички партии.

Во Виена презентираше прилично загрижувачка проценка за иднината на Европа, тврдејќи дека светот ќе изгледа сосема поинаку за една деценија отколку што е денес. Како примери за големи промени, тој ги наведе Франција и Германија, двете најважни земји на Европската Унија, кои, според него, се соочуваат со сериозни внатрешни проблеми.

Зборувајќи на панел-дискусијата „C3 Business Talk“, Курц ги поврза протестите што ја потресуваат Франција со недели со последиците од она што го смета за погрешна миграциска политика.

Тој предупреди дека голем број млади луѓе немаат перспектива, додека просперитетот што го уживале претходните генерации е сè потешко да се одржи. Според неговото мислење, француските проблеми покажуваат како погрешните политички одлуки можат да го променат општеството на долг рок.

Курц ја смета ситуацијата во Германија за не помалку загрижувачка. Тој оцени дека земјата е во тешка политичка ситуација, во која политичките групи од маргините добиваат на сила, додека партиите од политичкиот центар остануваат релативно слаби.

„За десет години ќе живееме во сосема поинаков свет“, рече четириесетгодишниот австриски политичар.

Курц се осврна и на американската политичка сцена, предвидувајќи дека државниот секретар Марко Рубио би можел да биде претседателски кандидат на Републиканската партија на изборите во 2028 година, додека негов потпретседателски кандидат би бил сегашниот потпретседател Џ.Д. Венс.

Иако, како што процени, Венс може да има поголема поддршка во рамките на републиканскиот табор, Курц верува дека Рубио има поголем потенцијал да привлече дел од гласачите на Демократската партија.

На прашањето дали размислува за враќање во австриската политика, Курц одговори дека отсекогаш уживал во политичката работа, но дека во моментов нема желба да се врати.

Поранешниот лидер на Австриската народна партија беше австриски канцелар во два наврати, од декември 2017 до мај 2019 година и од јануари 2020 до октомври 2021 година. Тој поднесе оставка по покренување истрага за обвинувања за корупција, а два месеци подоцна се повлече од политиката.

Курц за прв пат јавно проговори во врска со пишувањата во британските медиуми дека Москва може да стои зад неговиот политички пад, со наводна вмешаност на поранешниот шеф на компанијата Вајеркард, Јан Марсалек.

Тој рече дека самиот има многу прашања и дека ќе побара пристап до релевантните досиеја преку својот адвокат, со надеж дека околностите на целиот случај конечно ќе бидат разјаснети.

Текстот Себастијан Курц предупредува на големи промени во Европа е превземен од МАКФАКС.