Неговите сопруги се тепале во хотелски бар, селекторот на Египет доби отказ

Хосам Хасан повеќе не е селектор на египетската фудбалска репрезентација. Фудбалскиот сојуз на Египет (ФСЕ), ја прекина соработката со легендарниот поранешен напаѓач, кој ја водеше репрезентацијата од 2024 година, не поради спортски резултати, туку поради скандали во неговиот приватен живот.

Откакзот е последица на инцидентот што се случи во август, кога во хотелски бар се случила жестока расправија меѓу двете од сопругите на Хасан. Расправијата ескалираше во физичка пресметка, а сведоци изјавија дека жените викале, фрлале предмети и се тепале, поради што интервенирал хотелскиот персонал. Делови од инцидентот биле снимени и раширени на социјалните мрежи.

Според извештаите на медиумите, ситуацијата толку многу го вознемирила Хасан што се онесвестил, по што бил однесен во болница.

Сопругите не поднеле официјални извештаи една против друга. Да ве потсетиме дека Хосам Хасан имал две сопруги истовремено со години, што е законски можно во Египет, каде што на муслиманите им е дозволено да имаат до четири сопруги.

Тој има три деца со својата прва сопруга Ховаида Ел-Гарбави, со која се ожени во 1994 година, додека со својата втора сопруга Дина Мустафа, позната како Дан Адам, се ожени во 2015 година и со неа има две деца.
Нивната врска заврши со голем скандал во август 2026 година, кога двете жени физички се пресметаа во хотелски комплекс во египетското одморалиште Порто Марина. По ова следеа разводи и правни спорови.

ФСЕ не го спомена директно инцидентот во своето официјално соопштение, но потврди дека причината за отпуштањето се неодамнешните настани што го нарушија угледот на националниот тим.

„По анализата на сите околности и настани од последните неколку дена, како и нивното негативно влијание врз позитивниот имиџ и стабилноста на нашиот национален тим, Управниот одбор одлучи да му се заблагодари на Хосам Хасан и неговиот стручен штаб“, се вели во соопштението.

Одлуката е донесена и покрај фактот дека Хасан постигна историски успех со Египет, стигнувајќи до осминафиналето на Светското првенство во 2026 година, каде што беа поразени од Аргентина.

За време на неговиот мандат, тој ја предводеше репрезентацијата во 38 натпревари, со 21 победа, десет нерешени резултати и седум порази.

Мандатот на Хасан беше обележан со други контроверзии. По натпреварот против Аргентина на Светското првенство, ФИФА го казни со суспензија од три натпревари поради гестови и изјави поврзани со обвинувања за расизам. Неговиот брат Ибрахим ја доби истата казна, додека репрезентативецот Зико беше суспендиран на пет натпревари.

Али Махер, поранешен тренер на египетскиот клуб Керамика Клеопатра, беше назначен за наследник на Хасан.