Кејт Мидлтон откри што ѝ помогнало во борбата против ракот: „Имаше добри и лоши денови“

Британската принцеза од Велс, Кејт Мидлтон, изјави дека природата ѝ помогнала за време на закрепнувањето од болеста, нагласувајќи дека процесот на лекување не бил линеарен и вклучувал добри и лоши денови.

Кејт Мидлтон, исто така, истакна дека одморот, времето за размислување и поврзувањето со природата се подеднакво важни во процесот на закрепнување.

Во интервју за британскиот неделник „Country Life“, 44-годишната принцеза се осврна на своето искуство во борбата против ракот, кој ѝ беше дијагностициран во јануари 2024 година, и истакна дека природата ѝ помогнала повторно да воспостави подлабока врска со сопственото тело, ум и дух.

„Ми кажаа во болницата дека моето закрепнување нема да биде линеарно. Ќе има добри и лоши денови и ќе биде потребно време. Исто е и во природата“, рече принцезата, додавајќи дека природата нè учи дека периодите на одмор, размислување и обнова се подеднакво важни како и моментите на раст.

Таа истакна дека престојот во природа ѝ овозможил да има подлабока врска со сопствениот ум, тело и дух.

„Природата не бара ништо од нас. Не нè осудува и не очекува да постигнеме ништо. Едноставно ни овозможува да бидеме тоа што сме. За мене, тоа навистина беше засолниште и место каде што инстинктивно сакав да одам“, рече Кејт.

Зборувајќи за важноста на природата за време на лекувањето и закрепнувањето, таа истакна дека сериозната болест носи бројни физички предизвици, но дека постои и подлабока, внатрешна димензија која исто така треба да се земе предвид.

Според неа, науката денес го потврдува она што луѓето интуитивно го знаат и чувствуваат – дека природата и човековата благосостојба се тесно поврзани.

„Луѓето отсекогаш барале засолниште во природата. Без разлика дали станува збор за плажа што дава можност за закрепнување, природа што носи мир и поширока перспектива или планини што ви дозволуваат да бидете сами, луѓето одамна наоѓаат утеха во природната средина“, рече принцезата.

Таа оцени дека чувството на поврзаност, поддршката од блиски луѓе и местата каде што човекот се чувствува мирно се особено важни во тешките моменти од животот.

Кејт, исто така, зборуваше за важноста на природата за развојот на децата, наведувајќи дека престојот на отворено ја поттикнува љубопитноста, имагинацијата и креативноста, но исто така им помага на децата да развијат емоционална сигурност и чувство на припадност.

Таа истакна дека, во време кога децата и младите се изложени на дигитални технологии повеќе од кога било, важно е да им се овозможи да ја истражуваат природата и да развијат однос со светот околу нив.

„Природата е тивок учител“
Зборувајќи за тоа каде наоѓа надеж во тешки времиња, Кејт рече дека ја црпи од лекциите што ги дава природата, потсетувајќи ги луѓето дека не се сами и дека се дел од нешто многу поголемо од себе.

„Можеби не можеме да бидеме сигурни за исходот или да контролираме сè што се случува, но можеме да правиме мали работи. Ако го цениме она што нè опкружува и имаме вера, тие мали работи се собираат и навистина можат да направат разлика“, истакна таа.

Принцезата додаде дека закрепнувањето не е само индивидуално искуство, туку и колективен процес во кој заедницата, меѓусебната поддршка и поврзаноста со другите играат значајна улога.

Принцезата од Велс, исто така, рече дека една од најважните лекции во животот е потребата да се поминува квалитетно време со другите, да се застане и да се обрне внимание на светот околу нас.

„Затоа природата е толку важна за мене, таа е тивок учител. Понекогаш, кога животот е многу бучен, токму таков учител ни е најпотребен“, заклучи Кејт.

Кејт Мидлтон објави во јануари 2024 година дека боледува од рак, а во септември истата година ја заврши хемотерапијата.

Во јануари 2025 година, таа објави дека болеста е во ремисија.

Текстот Кејт Мидлтон откри што ѝ помогнало во борбата против ракот: „Имаше добри и лоши денови“ е превземен од МАКФАКС.