Зеленски: Американските ограничувања на сателитскиот интернет ја отежнуваат одбраната на Украина од дронови

Украинскиот претседател Володимир Зеленски повторно ги критикуваше ограничувањата на брзината на сателитската интернет-услуга „Старшилд“ во Украина, оценувајќи дека тие ја отежнуваат одбраната на земјата од напади со дронови.

Тој посочи дека ограничувањата и натаму важат долж целата фронтовска линија, како и на привремено окупираните територии. Поради тоа, им наложил на украинските министерства за надворешни работи и за одбрана да го отворат прашањето пред надлежните американски институции.

„Ова е многу лош сигнал“, рече Зеленски, предупредувајќи дека ограничувањата ја ослабуваат украинската одбрана од беспилотни летала. Според него, тие можат да ѝ испратат порака на Русија дека САД се подготвени поинаку да ги третираат привремено окупираните украински територии.

„Сметаме дека брзината повторно ќе биде овозможена“, порача украинскиот претседател.

Зеленски и претходно се пожали дека ограничувањата повторно се воведени, особено над делови од Украина под руска окупација.

Слични мерки беа воведени и во средината на октомври, кога Илон Маск, чија компанија „Спејс Икс“ управува со сателитската мрежа „Старлинк“, го обвини Киев дека цивилната интернет-услуга ја користи за напади со дронови, спротивно на условите за користење.

„Старшилд“ е воена сателитска интернет-услуга на „Спејс Икс“, но е под контрола на американската влада.

Украинската војска се потпира на интернетот преку „Старлинк“ за комуникација уште од почетокот на руската инвазија во февруари 2022 година. Украинските воздушни и поморски дронови, опремени со терминали „Старлинк“, се користат и за далечински управувани напади врз цели во Црното Море и на делови од украинската територија под руска окупација.

Текстот Зеленски: Американските ограничувања на сателитскиот интернет ја отежнуваат одбраната на Украина од дронови е превземен од МАКФАКС.