„Хуавеи“ ќе гради фабрика во Франција, ќе произведува опрема за 5Г технологија

Кинескиот телекомуникациски гигант „Хуавеи“ ќе гради фабрика на истокот на Франција за производство на опрема пред сѐ поврзана со 5Г технологијата, што ќе биде прва нејзина ваква фабрика надвор од Кина, соопшти денеска компанијата.

Во фабриката ќе бидат инвестирани најмалку 200 милиони евра и првично ќе бидат вработени 300 лица, а производството ќе биде наменето за целиот европски пазар.

Според „Хуавеи“, фабриката во Брумат, мал град на околу десетина километри северно од Стразбур каде има голема индустриска зона, треба да произведува опрема во вредност од милијарда евра годишно.

„Со оваа фабрика сместена на крстосницата на Европа, ‘Хуавеи’ ќе го збогати веќе силното присуство на континентот каде што има 23 центри за истражување и развој, повеќе од 100 партнерски универзитети, повеќе од 3.100 добавувачи и успешен ланец на снабдување“, соопшти кинеската компанија.