Владата ја продолжи мерката за намалување на акцизите на нафтените деривати до 15 јуни

Владата на денешната седница донесе одлука за продолжување на мерката за намалување на акцизите за 2 денари на нафтените деривати до 15 јуни.

Истовремено, како резултат на директните преговори со најголемиот домашен снабдувач „ОКТА“, обезбеден е дополнителен попуст од 2 денари по литар, кој стапува на сила од утре (понеделник, 1 јуни).

Со комбинирањето на овие две мерки, се очекува значително поевтинување на горивата на бензинските пумпи низ земјата, што според владините проценки ќе обезбеди директна поддршка за стандардот на граѓаните и за стопанството.

Според официјалните владини пресметки, новите мерки ќе донесат различно намалување кај двата клучни типа на горива:

Дизел гориво: Се очекува пад на цената за 6,5 денари по литар.

Бензини: Малопродажната цена ќе се намали за 1,5 денар по литар.

„Намалувањето на цените на горивата ќе придонесе кон намалување на трошоците за живот и работење, како и кон задржување на ценовната стабилност во услови на глобални економски предизвици. Владата останува посветена на политики што носат реални придобивки за граѓаните и ќе продолжи активно да презема мерки за заштита на животниот стандард и зајакнување на економската сигурност.“, се наведува во владиното соопштение.

РКЕ утре ги соопштува новите цени

Регулаторната комисија за енергетика (РКЕ) утре ќе ги направи финалните пресметки и официјално ќе ги донесе новите цени на нафтените деривати кои ќе важат на бензинските пумпи.

Во моментов, во земјава бензинот ЕУРОСУПЕР БС-95 се продава по цена од 87,5 денари за литар, 98-октанскиот бензин чини 89,5 денари, додека дизел горивото се точи по цена од 92 денари за литар.

Текстот Владата ја продолжи мерката за намалување на акцизите на нафтените деривати до 15 јуни е превземен од МАКФАКС.