Mитева: ФИТР го промени огласот со кој условуваше апликантите да бидат во добра состојба со властите

ФИТР ги промени условите на огласот за тоа кој може да аплицира и формулацијата „апликантите да бидат во добра состојба со властите“ ја замени со „апликантите е потребно да бидат признати и без примедби од соодветните органи на Македонија“, објави портпаролката на ВМРО-ДПМНЕ, Марија Митева.

Таа рече дека пред само еден ден Фондот за иновации ја убедуваше јавноста дека не станува збор за никаков проблем, туку дека е погрешно протолкувано, а условот сега е променет.

„Колку огласи на ФИТР до сега се поминати со вакви услови и далеку од очите на јавноста? Почитувани, очекуваме сега ФИТР да одговори кои се фирмите или физичките лица за кои власта нема примедби? Дали се истите фирми за кои претходно се велеше дека треба да се во добра состојба со властите или пак станува збор за построг критериум кој ќе го стесни кругот на можни апликанти? Ваквиот начин на функционирање преку кој се остава дамка врз огласот но и кредибилитетот на институцијата дома, но и пред меѓународните организации претставува основен показател зошто во Македонија никогаш не било полошо на секое поле. Затоа важно е да ги поразиме!“, додаде Митева.

Текстот Mитева: ФИТР го промени огласот со кој условуваше апликантите да бидат во добра состојба со властите е превземен од МАКФАКС.