„Nvidia“ изгуби 335 милијарди долари за едно утро поради аферата на извршниот директор

Американскиот технолошки гигант Nvidia изгуби приближно 335 милијарди долари пазарна вредност на почетокот на денешното тргување на Волстрит. Акциите на водечкиот светски производител на чипови за вештачка интелигенција паднаа за речиси 7,5 отсто, откако компанијата покрена истрага за афера во која е вмешан нејзиниот извршен директор, Џенсен Хуанг, и неговите наводни врски со жена која американските разузнавачки служби ја поврзуваат со кинеска шпионажа.

Цената на акциите на Nvidia падна на 172,75 долари, од 186,64 долари колку што изнесуваше при затворањето на пазарот во петокот. Како резултат на тоа, пазарната вредност на компанијата за кратко време се намали од приближно 4,5 трилиони долари на 4,16 трилиони долари.

Падот уследи по признанието на Хуанг дека ѝ бил неверен на својата сопруга. Американските медиуми претходно известуваа за неговата наводна врска со кинеска деловна жена по име Алис Хуанг, за која американските разузнавачки служби се сомневаат дека собирала информации во корист на Пекинг.

Управниот одбор на „Nvidia“ покрена независна истрага за да утврди дали оваа врска можеби ги загрозила деловните податоци на компанијата или националната безбедност на САД.

Од „Nvidia“ изјавија дека во моментов немаат причина да веруваат оти деловните тајни на компанијата или податоците важни за националната безбедност се загрозени, но напоменаа дека истрагата ќе ги опфати сите достапни информации.

Џенсен Хуанг е еден од основачите на „Nvidia“ и ја води компанијата уште од нејзиното основање во 1993 година. Под негово водство, „Nvidia“ стана водечки производител на чипови што ги придвижуваат напредните системи за вештачка интелигенција. Затоа, инвеститорите не се загрижени само поради можна безбедносна закана, туку и поради прашањето за иднината на Хуанг на чело на компанијата.

Аналитичарот Ден Ајвс предупреди дека Хуанг е исклучително важен за работењето на „Nvidia“ и дека неговото евентуално заминување би можело да претставува сериозен проблем за компанијата.

Во центарот на овој случај се наоѓа сингапурската компанија „Megaspeed“. Алис Хуанг е поврзана со „Megaspeed“, сингапурска компанија која изнајмува компјутерска моќ преку податочни центри опремени со процесори од „Nvidia“.

„Megaspeed“ претходно беше предмет на проверка од страна на САД, поради сомневања дека одредени напредни процесори можеби биле пренасочени кон Кина – земја која подлежи на американски ограничувања за извоз на одредени технологии.

Компанијата ги отфрли обвинувањата за незаконско пренасочување на чипови. Американскиот Конгрес сега бара дополнителни информации за контактите на Хуанг и за можните безбедносни импликации.

Кина ги отфрли обвинувањата за шпионажа, додека „Nvidia“ наведува дека досега нема пронајдено докази оти нејзините деловни тајни се компромитирани.

Падот на цената на акциите не значи дека „Nvidia“ изгубила толкава сума пари од своите сметки. Загубата од приближно 335 милијарди долари се однесува на пад на пазарната капитализација, односно на вкупната вредност на акциите на „Nvidia“ на берзата. Тоа не значи дека компанијата изгубила толкава сума во реални парични средства.

Бидејќи оваа промена се случи во текот на тргувањето, конечната дневна загуба ќе зависи од цената на акциите при затворањето на американскиот берзански пазар.

Текстот „Nvidia“ изгуби 335 милијарди долари за едно утро поради аферата на извршниот директор е превземен од МАКФАКС.