(Видео) Трговците кои ги зголемиле маржите ќе бидат предупредени, најави Мицкоски

Премиерот Христијан Мицкоски денеска најави дека во Министерството за економија и труд наскоро ќе се одржи состанок со трговците, откако Државниот пазарен инспекторат направи анализа на цените и трговските маржи на околу 700 производи.

Според премиерот, анализата покажала дека кај дел од производите е забележано зголемување на трговските маржи во споредба со истиот период лани.

„Очекуваме во најкраток период оние кои што ги имаат малку зголемено маржите споредено со истиот период од минатата година, од 2 до 5 проценти, зборувам на тие веќе постојни бруто-профитни маржи од 10 проценти. Да речеме, ако маржата била 10 проценти, сега е 12 или 15. Тие ќе бидат предупредени“, изјави Мицкоски.

Премиерот рече дека Владата ја охрабруваат најновите податоци за инфлацијата, наведувајќи дека во јуни таа изнесувала 3,4 проценти, што, според него, е најниско ниво во регионот.

Мицкоски оцени дека актуелните економски показатели претставуваат успех во услови на глобална економска неизвесност.

Тој потсети дека во јуни 2022 година, по почетокот на војната во Украина, инфлацијата во земјата достигнувала меѓу 14 и 15 проценти.

Текстот (Видео) Трговците кои ги зголемиле маржите ќе бидат предупредени, најави Мицкоски е превземен од МАКФАКС.