Владата ќе одржи вонредна седница за горивата: ДДВ-то за бензините се враќа на 18%, акцизите остануваат намалени

Владата денеска ќе одржи вонредна онлајн седница на која ќе донесе одлука за делумно продолжување на мерките за цените на горивата. Како што најави вчера премиерот Христијан Мицкоски, досегашната повластена стапка на ДДВ за бензините од 10% ќе се врати на редовните 18%, но граѓаните и натаму ќе добиваат поддршка преку акцизите.

Намалените акцизи за два денари за литар, кои важат и за бензините и за дизелот, ќе останат во сила. Дополнително, премиерот информираше дека се водат интензивни разговори со компанијата „Окта“ за обезбедување можен дополнителен попуст во првата половина на јуни.

Мицкоски: Дизелот значително ќе поевтини, бензините со минимална промена

Според првичните владини калкулации, по комбинирањето на новите мерки не се очекуваат ценовни шокови за потрошувачите. Премиерот Мицкоски излезе со конкретни математики за тоа како модифицираните мерки ќе се одразат во пракса:

„Кога ќе ги имаме предвид сите овие мерки, тогаш очекувам цената на бензините да остане иста или да има мало зголемување од половина денар, а дизелот да поевтини околу 6 и пол денара, 6 до 6,5 денара. Отприлика ова се бројките кои нашите калкулации ги кажуваат, а ќе видиме како ќе направи пресметка Регулаторна“, изјави премиерот.

РКЕ утре ги соопштува новите цени

Регулаторната комисија за енергетика (РКЕ) утре ќе ги направи финалните пресметки и официјално ќе ги донесе новите цени на нафтените деривати кои ќе важат на бензинските пумпи.

Во моментов, во земјава бензинот ЕУРОСУПЕР БС-95 се продава по цена од 87,5 денари за литар, 98-октанскиот бензин чини 89,5 денари, додека дизел горивото се точи по цена од 92 денари за литар.

Најевтини горива

Како одговор на енергетската криза и економските потреси предизвикани од почетокот на војната на Блискиот Исток, Владата претходно донесе обемен пакет мерки со цел да го амортизира ударот од растечките цени на светските берзи.

Покрај повластеното ДДВ и намалените акцизи, имаше и директен попуст од домашниот снабдувач во износ од 2, односно 3 денари по литар.

Благодарение на државните интервенции, Македонија има најниски цени на горивата во целиот регион, што предизвика масовна побарувачка и сериозен „нафтен туризам“ на бензинските станици лоцирани во близина на граничните премини со соседните земји.

Текстот Владата ќе одржи вонредна седница за горивата: ДДВ-то за бензините се враќа на 18%, акцизите остануваат намалени е превземен од МАКФАКС.