Итно зголемување на платите, во спротивно ќе останеме без кадар, порача Пешевски

Според потпретседателот на Сојузот на синдикати на Македонија за приватен сектор, Иван Пешевски, приватниот сектор во Македонија е главен двигател за економската состојба на државата.

Приватниот сектор, како што посочи, е нешто што мора веднаш да се подобри со квалификуван кадар и млади луѓе.

„Но, за овие две работи, потребни се достоинствени односно безбедни услови за работа и повисоки плати. Повисоки плати не се 500 евра плата, туку 500 евра минимална плата која ќе се множи со коефициентот на сложеност и со тоа ќе пораснат и останатите плати“.

Во овие дејности од приватниот сектор, како што истакна, не треба да има плати помали од 50.000 и 60.000 денари и барањето се однесува на сите работодавачи од приватниот сектор, особено на оние кои пред некој ден се изјасниле дека нема квалификуван кадар.

Пешевски им порача дека кадарот ќе недостасува уште повеќе доколку работодавачите не зголемат плата.

Потсети дека ССМ активно работи на правна заштита на работниците, и појасни дека во текот на 2024 година, бесплатна правна помош и заштита, добиле над 12.234 работници кои се обратиле до ССМ.

Тој обзнани дека додека се разгледува барањето на ССМ за бројот на членови, пријавени се повеќе напади кон членовите на гранките во ССМ и притисоци за отчленување и фаворизирање на друг синдикат кој не бара зголемување на плати.

„Оттука се сомневаме дека можеби и затоа е омилен синдикат на Владата. Нашиот апел е да не се наседнува на ваков тип притисок“, порача тој.

Ги повика работниците да се приклучат кон првомајскиот протест, а Владата и газдите конечно да ја побараат вината во своите редови, бидејќи како што рече, државата ќе остане и без тие работници.

Итно зголемување на платите особено на работниците во приватниот сектор, порача Пешевски.

Текстот Итно зголемување на платите, во спротивно ќе останеме без кадар, порача Пешевски е превземен од МАКФАКС.